طالب الإعلامي تامر أمين، اليوم الخميس، تجار مصر، بخفض أسعار السلع والبضائع، تزامنًا مع تراجع سعر الدولار، بالسوق السوداء، قائلًا: «لو عندنا تجار عندهم دم، بعد ما غلّوا الأسعار، وقولنا إنهم غلابة وبيستوردوا بالدولار فلازم يغلّوا، بداية من النهاردة وخلال أسبوعين لازم الأسعار تنزل». أضاف أمين، خلال تقديمه برنامج «الحياة اليوم»، عبر فضائية «الحياة»، «يعني العربية اللي كان ثمنها 150 ألف جنيه، وبقى 230 ألف، لازم ينزل سعرها تاني، وإلا تبقى حرام رسمي، وخاين لبلدك، نعذرك لما يبقى في زنقة، لكن أما الدنيا تريّح لازم تريّحها علينا إحنا كمان، عندي في مصر البضائع تعلى مع الدولار، لكن أما ينزل تفضل أسعار ثابتة». تابع: «لازم نعترف إن السيسي جامد، حيث أن تراجع سعر الدولار لم يحدث إلا بعد أن تدخل الرئيس، بعد ما قعد ساعتين زمن مع محافظ البنك المركزي، والمجموعة الاقتصادية في الحكومة، وكمان مدخلش بتُقله، ده يدوب حمّرلهم عينه بس، ده لو واجه أزمة الدولار بنفسه مش بعيد نلاقي الجنيه ثمنه 10 دولار وليس العكس». وشهدت السوق السوداء، تراجع سعر الدولار، في مقابل الجنيه، بعد أن تخطى، مؤخرًا، حاجز ال13 جنيهًا، لأول مرة في تاريخ مصر.