قبطي عبر «فيسبوك»: شكرا للنادي الأهلي على العنصرية

كتب: مصطفى جلال
انتشر على موقع التواصل الاجتماعي "فيسبوك"، اليوم الأربعاء، قصة لأحد النشطاء يروي فيها تعرض شقيقه للتعنت في اختبارات الناشئين بالنادي الأهلي بسبب أنه "قبطي".
ويقول بيشوي عاطف صاحب القصة المنتشرة: "أخويا كان بيقدم في اختبارات النادي الأهلي، الاختبار عبارة عن ماتش كوره 5 دقائق، وطبعا اللي بيلعب كورة عارف قد إيه أصلا ده اختبار ظالم، المهم أخويا نزل و في ال5 دقايق جاب جونين وعمل دوبل كيك واتشقلب في الملعب من الآخر، لدرجه إن الكابتن جاله وقاله برافو عليك يا واد، حصل إيه بقي الكابتن طبطب علي أخويا و شاور للي بيكتب الأسماء يسجل اسمه، اللي بيكتب الأسماء شاورله علي معصم إيده (مكان الصليب)، و شاور له بإيده لأ مع إن اسمه (توني) يعني مسموش (جرجس)".
وأضاف بيشوي قائلا: "طب بعيدًا عن العنصريه و بعيد عن الظلم، أخويا عنده 13 سنه، وحس بهذا الكم من الظلم تفتكروا ده هيطلع بيحب بلده ولا بيكرهها، تفتكروا هيطلع بيحب أخواته المسلمين ولا هيكرههم.. شكرا للنادي الأهلي على العنصرية".