الإجازة حلوة من غير ماما وأخويا والصيف!

الإمتحانات خلصت .. وكلنا بنحب الإجازة، وبنستناها بفارغ الصبر، فيه اللى بيحب يسافر ويطلع مصيف، واللى بيلعب كورة، لكن الغريب إن فيه ناس بتتضايق من الإجازة علشان حاجات معينة خاصة بيهم ، تفتكروا إيه ؟
الإجازة حلوة لكن طلبات ماما فيها هى إللى بتضايقنى .. ده رأى أحمد سيد وإللى بيقول : بحب الإجازة لأني بلعب فيها كورة مع أصحابي بدون قيود المذاكرة، لكن أيام الإجازة طلبات ماما لا تنتهى بداية من الإفطار كل يوم ولغاية الحاجة الساقعة بعد العشاء.
##
أما محمد حمص فيقول: أجمل حاجة في الإجازة هي الراحة وعدم المذاكرة والخروجات بالليل والمصيف مع أصحابي طبعا مش مع العيلة، أما أرخم حاجة في الإجازة هي صعوبة خروج خطيبتي معايا، لكن أيام الدراسة بقدر أشوفها كل يوم، وكمان أرخم حاجة فى الإجازة هى أفراح أقاربى إللى لازم أحضرها غصب عنى.
ويقول أحمد محسن: الحر أصعب شيء في الإجازة وأقترح على الحكومة أن تجعل الإجازة في الشتاء لأنه مهما كان الجو صعب مش هيكون أصعب من الجو إللي بنعيشه اليومين دول، و أجمل حاجة في الإجازة طبعا هي الخروج والفسح.
##
أما مروة أحمد فتقول: أنا بجد بكره الإجازة " كره العمى " بسبب أخويا الصغير إللي كل يوم طالع لنا بمشكلة بسبب الكورة ، و طبعا بحب الخروج في الإجازة مع صحابي لكن بابا بيركز في مواعيد الخروج في الصيف أكثر من الشتاء معرفش ليه؟
ويقول محمود إبراهيم: بحب الإجازة علشان المصيف و الكورة و اللعب والبلاى ستيشن، وبكره الإجازة لأن الخروج مع حبيبتى بيقل في الصيف عن وقت الدراسة " وهو ده عيبه " .