اعتدت منذ اعوام ان اراقب تحركات اسرتي الكريمة في ساعات ما قبل المصيف, واكتشفت أخيرا ان لعائلة الجيزاوي الموقرة طقوسا أو عادات مصيفية عجيبة لذا قررت ان اجمعها وادونها.. علي أمل أن أقرأها في يوم ما وأحمد الله علي اختفائها من حياتي اعزائي القراء اليكم تفاصيل النشر. العادة الأولي: بتظهر ليلة السفر لما بابا يفاجئنا ويقول يا جماعة ناموا بدري عشان هنصحي الساعة5 أول مايخلص الجملة تروح ماما علي طول قايلة بصوت عال قوي ايه ده بدري قوي: هي6 كويسة الغريب في الموضوع اني كل سنة باصحي علي نفس الجملة اصحي يا لينة احنا متأخرين مفيش وقت للدلع ده!! وانا في سري بقول متأخرين؟ ساعتها بقي بابا بيديني الضاربة القاضية الساعة7 واحيانا بتبقي7 ونص. فضلت اتصدم كدة كام سنة لحد ما تعودت علي عكسأ ماما بقي.. كل سنة تتصدم لما بابا يقول هانصحي الساعة خامسة مع انها عارفة اننا لاهانصحي5 ولا6 بس لازم تعمل اثارة وتشويق. العادة الثانية: اعملكوا ساندويتشات اي تفطروا بها بكرة يا ولاد؟؟ ماما دايما تسألنا السؤال اللولبي ده! وكالعادة بتكون الاجابة اي حاجة لكن ماما لازم تصمم علي اجابة واجابة سريعة كمان, ساعتها بقي بقول اي اجابة بجد.. حتي لو حاجة مبحبهاش لاننا دايما.. ننسي السندويتشات! هي دي العادة العجيبة.. مش السندوتشات نفسها! ولو ربنا كرمنا وافتكرنا يبقي لازم ننسي ازازة المية. موضوع ازازة الميه دي بقي بيضايق ماما جدا.. لانها بتفتكر تحطها في الثلاجة بالعافية! وياحرام اول ما نركب العربية ماما تفتكر اية ده نسينا الميه وانا لازم اطمنها بردو خلاص ياماما نجيب من اي حتة واكمل في سري زي كل مرة ياست الحبيب ولسه الطقوس مخلصتش. العادة الثالثة: هنجيب اية نقرأه؟ دة كمان سؤال لازم ماما تسأله احنا عيلة فرفوشة قوي وبردو لازم اختار مجلة ميكي. دي شوية طقوس لعائلتي الحبيبة, بس كل دة قبل المصيف.. واحنا في المصيف بقي حاجة تانية خالص بابا علي طول لازم واحنا في الطريق يكلمنا عن المعالم السياحية بتاعت المكان اللي احنا رايحين له, واللي طبعا هنروحها اول ما نوصل.. والا السفرية تبقي مملة! اخره كل الحماس دة بقي ايييه؟؟ طول السفرية قاعدين في البلكونة!! بابا وماما يشربوا في مشروبات ويتكلموا وهما باصين للبحر! واخويا دايما مش موجود.. وانا ياحرام ماشية اراقب الناس تفتكروا دي علامة اية؟صاحب المدونة:
