فيديو.. شردي ينتقد ضريبة «الإذاعة والتليفزيون»: هشيل الراديو وهحط «كاسيت»

تحدَّث الإعلامي محمد شردي، عن مقترح تقدَّم به اتحاد الإذاعة والتليفزيون إلى البرلمان، وهو مشروع قانون خاص بفرض ضريبة سنوية قدرها 100 جنيه على كل سيارة بها راديو.
وقال شردي، خلال برنامج «يوم بيوم»، المُذاع على قناة «النهار» موجهًا حديثه إلى إدارة ماسبيرو: «لا أهاجم زملائي في مبنى الاتحاد، الله يكون في عونهم، إحنا مش ناقصين تقعدوا تضربوا إيدكم في جيوب الناس عيني عينك كده، يا جماعة أنتم قاعدين تفكروا إزاي تجيبوا فلوس من أي حتة أو أي مكان وخلاص، وإيه التوقيتات الغريبة اللي بتقدموا فيها مشروع زي ده، استنوا الناس تشم نفسها شوية».
وتابع: «أنتم إزاي عندكم 27 قناة في التليفزيون الرسمي للدولة، هو إحنا محتاجينهم مثلًا؟! ده ما بيحصلش في أي دولة تانية، أنتم بتخترعوا، مين اللي قال لكم قدموه كده، ماعتقدش النواب هيوافقوا على حاجة زي كده، يا سيدي أنا مش عايز أسمعك، أنا هكسر الراديو وهشغل الكاسيت، إيه رأيكم بقى، الناس تعمل حملة لمقاطعة الإذاعة المصرية، حملة شيل الراديو وحط كاسيت».