السياسة المصرية نجم حفلة ال«ميوركس دوور» فى بيروت

فى حفل «الميوركس دور» الذى أقيم الأحد الماضى بكازينو لبنان بيروت وسط ظروف مضطربة فى لبنان، تم تكريم عدد من النجوم المصريين من بينهم إلهام شاهين وليلى علوى وغادة عبد الرازق ومحمود قابيل ولارا إسكندر وبوسى شلبى. وقالت إلهام شاهين «باشكركم جدا لدعمكم للفن المصرى وباطمنكم الفن المصرى هيفضل بخير ومصر هتفضل بلد الأمن والأمان وأم الدنيا، وباطلب منكم إنكم تدعولنا واحنا داخلين على مرحلة صعبة ممكن تغير تاريخنا فى المنطقة العربية». وأضافت «باهدى التكريم ده للجيش المصرى وتمردوا تصحوا، واحنا لازم نتمرد وندافع عن حقنا فى حبنا للفن والدنيا، ونقف ضد دعاة الظلام والجاهلية، واللى بيكره الفن بيكره الحياة، ربنا ينصرنا وينصر الجيش اللبنانى وربنا معاكم وربنا ينصر الجيش المصرى والسورى والليبى ويا رب تنزاح الغمة». ليلى علوى قالت فى كلمتها «باشكركم جدا للميوركس على تكريم السينما المصرية اللى أنا جزء صغير منها، وأنا من جمهور السينما المصرية والوطن العربى كله قلب السينما المصرية، وشفت أفلام مشتركة بين مصر ولبنان من فاتن حمامة وصباح وسعاد حسنى ونجلاء فتحى. وباقول يا رب دائما نفضل مع بعض والفترة اللى جاية فيها إنتاج مشترك بين مصر ولبنان. وتحية للجيش البنانى ولبنان، وأنا عارفة قد إيه بتدعى لمصر وعارفة إن فى ناس نفسها تنزل مصر وتشوف الأمن والسلام اللى كان موجود وهيرجعلنا». محمود قابيل وجه تحية إلى لبنان والجيش اللبنانى، وقال «أيضا أوجه تحية من لبنان إلى فنانى ومبدعى وإعلامى مصر المعتصمين فى وزارة الثقافة.
جدودنا زمان فى ثورة 19 قالوا (الدين لله والوطن للجميع)». بوسى شلبى فى كلمتها قالت: «باشكر فادى وزاهى إنهم بيكرموا الفن المصرى. الفن المصرى فى قلوب كل العرب، واسألوا الشحرورة هيا كانت الجسر اللى كان بيربطنا بلبنان، وباشكر كل لبنانى بيحب الفن المصرى وبيكرمه فى ظل الظروف اللى بنمر بيها. فى شهيد ضحى بنفسه السنة اللى فاتت على أرض مصر، وراح شهيد وهو واقف وبيدافع بالصدفة مع الشرطة المصرية ضد الإرهاب». أما غادة عبد الرازق فقالت «أطلب من الجيش المصرى أن يقف مع شعبه، وماينساش أولاده اللى نازلين قريب وواثقة إنه مش هيسيب دم ولاده ينزل عالأرض. ورمضان ده هيعدى علينا أحلى من رمضان اللى فات».
أما إليسا التى حصلت على جائزتى أفضل مطربة وأفضل أغنية «أسعد واحدة» فقالت «أنا وانا جاية ماكنتش مبسوطة بسبب الأجواء اللى بتحصل فى لبنان. ولما جيت وشفت الناس من الوطن العربى انبسطت والوضع اللى بنشوفه بالوطن العربى مش هين. وأتمنى أن تكون الموسيقى منفذا للخروج من الأزمات، وباشكر كل جمهورى اللى صوتولى و(روتانا) ومدير أعمالى، وباهدى الجائزتين إلى لبنان والجيش اللبنانى». حضر الحفل عديد من النجوم أبرزهم ماجد المهندس، ووائل كفورى، والشاب خالد، وأحلام، ونوال الكويتيّة، ونانسى عجرم، وإليسا، ومايا دياب، وسيرين عبد النور. وحصل بعض الفنانين على جائزتين مثل إليسا ووائل كفورى عن أعمالهما وألبوماتهما، وحصل البعض الآخر على جوائز خاصة مثل أحلام عن مسيرتها الفنية.