علّقت الإعلامية سارة حازم، على قرار المهندس شريف إسماعيل، رئيس مجلس الوزراء، بإعفاء المستشار أحمد الزند، وزير العدل، من منصبه، مساء الأحد، قائلًة: «درس مهم للمسئولين الحاليين والقادمين، كل واحد يخلي باله من لسانه، لأن بقى في (بُع بُع) اسمه مواقع التواصل الاجتماعي، كمان درس لوزير العدل الجاي، خد بالك الوزير اللي قبلك، واللي قبله، طاروا بسبب زلة لسان، خلي بالك من لسانك». أضافت «سارة»، خلال تقديمها برنامج «الصحافة اليوم»، عبر فضائية «النهار اليوم»، «علشان نفهم الغضب الكبير ده كان ليه على المستشار الزند لازم نراجع سجله في التصريحات المثيرة للجدل، ممكن الناس تسامحك في زلة لسان، بس ده شيء مرتبط باعتبارات كتير، أهمها إنها تكون زلة اللسان الأولى لشخص معروف باتّزانه، لسانه مابيزلش كتير، لكن للأسف المستشار الزند من الناس اللي زلات لسانها كتير أوي، لدرجة إنك صعب تسمعله حوار من غير ما تطلع زلات تورط الدولة». وكان المستشار «الزند» قد تعرض، لانتقادات واسعة، على خلفية تصريحه بأنه «ملتزم بحبس أي مخطئ في الدولة، حتى إذا كان النبي، صلى الله عليه وسلم»، وذلك خلال لقائه ببرنامج «نظرة»، مع الإعلامي حمدي رزق، عبر فضائية «صدى البلد».