نشرت نادية شقيقة الفنانة الشابة ميرهان حسين عبر صفحتها الشخصية بموقع التواصل الاجتماعي فيسبوك صورًا للإصابات التي تعرضت لها شقيقتها خلال اعتداء ضابط الكمين الذي أوقفها أثناء عودتها بعد تصوير مشاهدها في مسلسل "المغني" بالهرم. وقالت نادية عبر "فيسبوك": أختي اتهانت ظلم يا بلد الأمن والأمان، البلد اللي له حق فيها مبيجيش، أختى راجعة من التصوير الفجر (طبيعة شغلها كدة)، وقفها كمين والظابط عادي طلب رخص و قالها أقفى في جمب فطلعتله الرخص ووقعت من إيده بعد ما أخدها ونزل يجيبها في نفس اللحظة وهي بتتحرك خبطته بالمرايه في إيده، إزاى دا يحصل! قام مدخل إيده يشد المفتاح وخبطها في صدرها و قالها إنزلي طبعاً ارتبكت ورفضت تنزل فضربها بالقلم ورد فعل طبيعي منها شتمته ولما لقاها بتشتمه كده جاب واحد يصور من أول ما شتمت، طب هو في حد هيشتم كده من غير فعل يدفع لده؟". وأضافت: "بيلبسوها محضر سكر مع العلم إن ميرهان مبتشربش، وفي دكتور كشف عليها وقال إن هي في قمة اتزانها، لكن طبعا لازم الكلام يتحرف ويتغير عشان موقف الظباط يبقى سليم، بس اللي معملوش حسابه إن ربنا مبيظلمش وإن في فيديو و هي منهاره و بتقول (رجالة مصريين بيضربوا بنت مصرية) وطبعاً ده سبب إنهم ياخدوها القسم وهناك اتعرضت لأقذر المعاملة واتضربت واتهانت ورشوهم ببول وميه هي والمساعدة بتاعتها و كل آثار الضرب واضحة.. ومش أول مرة نسمع عن الظباط اللي كدة و حاجات من النوع ده، بس فعلاً اللي بنشوفه في الأفلام قليل على اللي اتعمل فيها".