«إسلام جاويش» يكشف تفاصيل القبض عليه: مش هبطل رسم

بعد إلقاء القبض على رسام الكاريكاتير "إسلام جاويش" واتهامه بعدة تهم من بينها إدارة صفحة بدون ترخيص ونشر رسوم مسيئة للنظام، أمرت النيابة، أمس الإثنين، بإخلاء سبيل جاويش من سراي النيابة بدون ضمان، ونشر رسام الكاريكاتير الشهير، اليوم، عبر صفحته الرسمية "الورقة" على "فيسبوك" توضيحا لملابسات القبض عليه.
ووجه جاويش شكرا لجميع من ساندوه قائلا: "أول حاجة شكرًا لكل واحد وقف جنبي، وكل واحد تضامن مع الموضوع، وبشكر رسامي الكاريكاتير كلهم على موقفهم، والكُتاب ونقابة الصحفيين والفنانين والحقوقيين والاعلاميين وكل من نشر بيانات تضامنيه والجمهور والأصدقاء، واللي طعن واتهمني بدون وجه حق ربنا يسامحه".
وأوضح: "الساعة 12 دخل مجموعة من ضباط مباحث المصنفات وبدأت تفتش المقر وتصوره ، فحصوا أجهزتي الخاصة وبعدين أجهزة الشركة، سألوني على بعض الأشخاص في البداية، ده كله وأنا مأشوفتش أصلا أمر النيابة ولا عارف هما عايزين مين بالأخص".
وتابع: "الضابط خد بطاقتي الشخصية وسألني: هل لمشروع الورقة ترخيص؟ قولتله ترخيص إزاي يا فندم؟ قالي: أنت بتدير موقع بدون ترخيص.. وحاولت مرارًا إني أفهمه إنها صفحة "فيسبوك" مش موقع أصلًا"، وأضاف: "دخلت أوضة وكان فيها اتنين ضباط من اللي كانوا مرافقين للحملة، وقالولي بص على أقوالك وامضي، بصيت على الأقوال لقيت مكتوب إني بدير موقع بدون تراخيص وعندي أجهزة كومبيوتر بدون ترخيص وإني بصمم جرافيك على برامج غير مرخصة! وإني برسم كاريكاتير فيه اسقاطات على رموز الدولة! دا كله في هيئة أسئلة ومتجاوب عليها كمان!".
"قالولي لو حابب تعدل في إجاباتك عدل، قولتلهم أنا ما اطلعتش على المحضر من الأساس قالولي مش مهم المحضر المهم أقوالك، قولتله يا فندم أنا مبفهمش في القانون ومش همضي إلا في وجود المحامي، بعد شوية محاولات في اقناعي بالإمضاء وإني لو مماضيتش مش هيقى في صالحي، قاللي خلاص هكتب محضر من أول وجديد وهقول إنك رفضت الإمضاء وده مش في صالحك"، هذا ما أوضحه جاويش بشأن محاولات الضباط لإقناعه بالإمضاء على المحضر.
وقال جاويش: "بعد الكتابة لقيتهم بيقولولي مبروك يا إسلام بابتسامة، أنا مفهمتش ليه، أخدني واحد من ضباط المصنفات لضابط الحجز واداله رقم المحضر، وبعدها قاللي مع السلامة يا إسلام ومشي".
وتابع: "قبل العرض على النيابة وبعد ما الموضوع انتشر جدا على السوشيال ميديا عرفت التهم الموجهة لي حسب بيان وزارة الداخلية، اللي هي عبارة عن اتهامات إدارة موقع بدون تراخيص وما ورد في البيان الداخلية، واختفى فجأة اتهام "إني برسم كاريكاتير فيه إسقاطات سياسية"، وجت التحريات لا تدينني بأي شئ، وخرجت من سرايا النيابة مخلى سبيلي!".
واختتم جاويش كلامه قائلا: "عمومًا هفضل أرسم أفكاري.. مش هأبطل رسم، وهكمل اللي أنا حابه وهفضل شغال فيه، وأنا لا بطبّل لحد ولا بشتم حد، ولا منحاز فكريًا لحد وليا أرائي سواء الفكرية أو السياسية الخاصة، ولا متطرف في الحوار ولا بدعي البطولة والمثالية".