فيديو| القرموطي للجندي: باسورد صفحتك مع المدام.. ويرد: «مقدرش أقول لا»

قال الشيخ خالد الجندي، اليوم الثلاثاء، إن الشيخ سالم عبد الجليل، وكيل وزارة الأوقاف الأسبق، أصاب كبد الحقيقة بتحريمه لإضافة الفيتات الشباب عبر موقع التواصل الاجتماعي «فيسبوك»، لافتًا إلى أن القضية من الخطورة بمكان، خاصة إن مصر تحتل المرتبة رقم 3 بين دول العالم في دخول المواقع الإباحية.
وأضاف الجندي، خلال مداخلة هاتفية مع الإعلامي جابر القرموطي، ببرنامج «مانشيت»، عبر فضائية «أون تي في»، «الشعب بخير، ولكن في أزمة سلوكية، بقينا في جزر منعزلة داخل الأسرة الواحدة، لما تبقى الزوجة لها (باسورد) والزوج له (باسورد) فهذا خطر وخطأ ومصيبة، وهذه الخصوصيات قد توجد بين الأصدقاء ولكن لا توجد بين الزوج والزوجة، لا توجد أبواب مغلقة بين الزوجين، إزاي الزوجة تضيف رجال، والزوج يضيف نساء، وكل واحد فيهم عنده اللي (مأنتم) معاه».
وردًا على سؤال القرموطي، «حضرتك عندك صفحة على الفيس يا شيخ خالد، ويا ترى المدام عارفة الباسورد؟»، قال الجندي: «آه طبعًا، والباسورد المدام هي اللي حفظاه وبتغيره كل شوية، أنا أقدر أقولها لأ، ده إحنا رجالة أوي في بيوتنا، يا فندم أنا آخر كلمة في البيت كلمتي، وبتكون حاضر، إحنا حزب الريس حنفي»، فعلق القرموطي: «إحنا كلنا كده على فكرة، أنا مش بقول حاضر وبس، أنا بقول حاضر وتحت أمرك كمان».