بالفيديو| عمرو أديب: «الأوضاع زفت والبلد بتتلكك عشان تقوم بثورة ثالثة»

قال الإعلامي عمرو أديب، اليوم الأحد، إن «البلد بتتلكك عشان تقوم بثورة ثالثة، تحصل انتهاكات الشرطة، يقولك على الميدان، حملة الماجستير عايزين يتعينوا في الحكومة، يقولك على الميدان، ارتفاع الأسعار وبتاع، يقولك على الميدان، هو البلد ليه بتتلكك، في تلكيك عشان يبقى في ثورة، والتالتة تابتة بقى».
وأضاف أديب، خلال برنامج «القاهرة اليوم»، عبر قناة «اليوم»، «مفيش أي طريقة تانية نتكلم بها غير الثورة، هو الشعب عايز يعمل ثورة يوم أه ويوم لا، مبتعبتوش، وبعدين إحنا وصلنا لإيه بالثورات، ما الأوضاع زي الزفت زي ما إحنا شايفين، أنيل من الزفت كمان، نتدهور بحالة غير طبيعية، وبعدين ليه 25 يناير بالتحديد، هي 25 يناير العيد القومي للثورة».
وتابع: «طيب وبعد ما ننزل التحرير تاني عشان نقوم بثورة، هنعمل إيه، ما إحنا قبل كده عملنا ثورة ومعرفناش بعدها نعمل إيه، والإخوان بعدها ركبوا عليها، وركبونا كلنا، ومجلس رئاسي وبتاع، وبعده مجلس عسكري، وجبنا الإخوان، ومشينا الإخوان، هو إحنا عايزين إيه يا جماعة بالظبط، أنا والله ما بقيت عارف، ولا حتى الناس عارفة، حتى الناس اللي مش عايزة تقوم بثورة متعرفش هي عايزة إيه».