وجّه الفنان تامر حسني الشكر عبر صفحته الرسمية على موقع التواصل الاجتماعي "فيسبوك" لكل من حضر العرض الخاص لفيلمه الجديد "أهواك"، الذي أقيم مساء أمس الأحد، في سينما بلازا بالشيخ زايد، بحضور أبطال العمل وصنّاعه. وكتب تامر: "ألف شكر لكل من حضر العرض، وشكرًا لزملائي الفنانين اللي فعلًا باركولي من قلوبهم، وبشكر جميع السادة الصحافيين والإعلامين، وبجد أنا أكتر من فرحان من ردود أفعالكم على الفيلم والأغاني؛ لأني توقفت ثلاث سنوات عشان أذاكر أكتر وأجتهد أكتر في تقديم مرحلة جديدة، وفرحان إننا عملنا فيلم فرحكوا وضحكوا والعيلة كلها تقدر تشوفه". وأضاف: "بشكر كل أبطال العمل اللي فعلًا مفاجأة كبيرة للجمهور، وكل واحد فيهم أدى دوره بشكل أكتر من هايل، بشكر السبكي إنه صدقني في فكرة إنه لازم يغير ويطور ويصرف على الصورة، وأهو انهاردة عمل كده ونص ومقالش على أي طلب لأ مهما كان وقدم لنا رنا بنته عشان تنتج بنفسها الفيلم ده تحت إشرافه، بشكر مدير التصوير الراقي الموهوب المذهل جلال الذكي على تقديم هذا النوع من الصورة والجودة لأول مرة في فيلم عربي". واختتم حديثه بشكر المخرج محمد سامي قائلًا: "هفضل أقول عليه عبقري طول حياتي، محمد اللي صور شوارع مصر وأماكن مصر بالرقي ده، اللي خلّا كل ممثل فينا يمثل باختلاف، بقوله أمام الجميع شكرًا يا محمد، وأنا فخور إني قدمت للساحة الفنية فنان بموهبتك اللي ملهاش زي، بشكر كل من ساهم في إظهار الفيلم للنور، وجميع صناع العمل، وسينما أمريكانا بلازا على استضافتهم الكريمة، والتنظيم الرائع لليوم من صديق عمري وليد منصور، وبشكر أصدقائي الغاليين الأستاذ محمد علام والأستاذ وليد توفيق على تنسيق وتنظيم الحملة الإعلانية الكبيرة للفيلم". يذكر أن فيلم "أهواك" بطولة تامر حسني، وغادة عادل، ومحمود حميدة، وأمل رزق، وانتصار وأحمد مالك، وقصة وإخراج محمد سامي، وشارك في كتابة السيناريو والحوار وليد يوسف.
