أمير عيد: تذاكرنا مش غالية وعملنا حفلات مجانية كتير

ردّ أمير عيد نجم فريق كايروكي الغنائي، عبر صفحته الرسمية على موقع التواصل الاجتماعي فيسبوك على ااإنتقادات التي وجهها عدد من الجمهور للفريق بعد الإعلان عن أسعار تذاكر الحفلة القادمة للفريق والمقرر إقامتها يوم الجمعة 17 أبريل في نادي جزيرة الورد بمدينة المنصورة، قائلًا "أسعار حفلاتنا زي ما هي من سنه 2012 و متغيرتش باستثناء حفلتين تلاته في السنه، وبيبقي بمشاركه مع فرق أخرى، أو بيكون حدث كبير ومكلف زي ساوندكلاش".
وأضاف عيد "كفايه مبالغة في موضوع ارتفاع الأسعار ممكن تدخلوا على صفحه كايروكي وتراجعوا الحفلات اللي عملناهم السنه دي وتشوفو أسعارهم والسنة اللي فاتت وأخرهم حفلة الساقية، وتشوفوا الأسعار وتشوفوا عدد الحفلات المجانية اللي بتتعمل، وممكن تعمل مقارنات، وأنا على حد علمي مفيش فنان أو فرقة بتعمل عدد الحفلات المجانية اللي بنعملها، وأحب أقول للصحافة إن كل المعلومات دي متوفرة على صفحتنا، لو حضراتكم بتدوروا على الحقيقة، لأن ميصحش إننا نعمل حفلة واحدة غالية وحضراتكم تقرروا إن كل حفلاتنا غالية".
وتابع عيد "بالمناسبة حفلة المنصورة سعر التذكره 120 جنيه، والحفله فيها تلات فرق غيرنا واللي حضراتكم مش فاهمينه إن مش احنا اللي بنحدد سعر التذكرة وبالنسبة لأجر الباند كايروكي أصلا سعرهم في المحافظات أقل من القاهره 50 في المية يعني احنا مش مستفيدين حاجة زيادة لما سعر التذكرة يكون غالي احنا في النهاية موسيقين يعني منفهمش في البيزنس ولا تنظيم الحفلات".
واستأنف عيد كلامه قائلًا "إن دخل أي فرقة موسيقية معتمد على الحفلات واحنا اللي بننتج لنفسنا عشان نعمل ألبومات وفيديوهات على أعلى مستوى، وفي النهايه الألبومات دي بتتسرب والأغلبية بينزلوها ببلاش وده بصراحة ملوش غير معنى واحد وهو إننا نقضي على الصناعه دي تمامًا وأي حد نفسه يغني أو يكون فرقه يروح يشتغل حاجه تانية لأنه ممنوع بيبيع سيديهات وممنوع يعمل حفلات وأصلًا الفيديوهات اللي بيعملها ممنوع حتى تتعرض على التلفزيون.. شكرًا وأرجو تكون الصورة وضحت".
يذكر أن الفريق قد تعرض للعديد من الانتقادات، بعد وصول سعر تذكرة حفلتهم القادمة في المنصورة والذي ينظمها راديو حياة إلى 120 جنية للتذكرة.