عزيزي القارئ ... إوعى الطوارئ

الحزب الوطني يتهم البرادعي بالمتاجرة بالأزمة وتسييسها و"عدم مراعاة مشاعر الشعب" وذلك لأنه أرجع حدوث جريمة رأس السنة إلى غياب السلام الاجتماعي وتقييد الحريات واتهم النظام بالاستخفاف بعقول الشعب والعجز عن حماية المواطنين... وفي الوقت نفسه تقوم قوات الأمن بمطاردة واحتجاز النشطاء المتظاهرين والتعدي عليهم بالضرب البرح الذي أدى إلى إصابة العديد منهم عند قيامهم بالتظاهر احتجاجا على الأعمال الإرهابية...يبقى البرادعي برضو هو اللي مابيراعيش مشاعر الشعب!!!!؟
صرح نائب رئيس المجلس القومي لحقوق الإنسان بأنه "لولا الطوارئ لكنا أصبحنا عراقا ثانيا"!!!!! كان نفسنا قبل مانسمع تصريح زي دة نقرا عنوان في أي جريدة في أي يوم من التلاتين سنة اللي فاتوا يقول مثلا .."الأمن يجهض محاولة للإرهاب في منطقة كذا" أو " القبض على مجهول كان يرتدي حزاما ناسفا بالقرب من منطقة كذا"...أي واجب كدة نكسر بيه عين الشيطان ويحسسنا اننا ناس قليلة الأصل اننا بنطالب بإلغاء قانون الطوارئ اللي خيره علينا بعد عِشرة السنين اللي بينا وبينه
قالت مصادر أمنية أن تعليمات صدرت إلى جهات سيادية "بدأت" في تركيب كاميرات مراقبة دقيقة وحساسة على جميع مداخل الكنائس المصرية في المحافظات قبل احتفالات عيد الميلاد .. وأضاف المصدر أن كاميرات المراقبة كانت مقصورة على مكاتب الصرافة والمعارض والمحال الكبرى والكنائس الشهيرة ولكن تقرر نشرها في جميع كنائس مصر ...يعني ماشاء الله كاميراتنا موجودة وقاشيتنا معدن ومش حانشحت حاجة من حد وكمان التهديدات جتلنا بالسلامة من القاعدة وعارفين اننا حاننضرب بس افتكرنا القاعدة بتهزر فماحبيناش نستلف الكاميرات من مكاتب الصرافة والمحلات الكبرى ومايحصلش حاجة وتبقى جمايل على الفاضي... بس المرة دي حانصحصحلهم عشان مش احنا اللي ناكل 12 قفا على سهوة
وأخيرا تصريحات اللواء عبد الفتاح عمر وكيل لجنة الأمن القومي بمجلس الشعب (سايبالكم دي في الآخر عشان تحلّوا بيها) بيقولك ايه بقى .."البرلمان الموازي هو السبب في الحادث الإرهابي"...يانور النبي .. والنبي يا أستاذ توضح ازاي لحسن البُعَدا مابنفهمش
عزيزي القارئ.. إذا عرفت تفهم اللي يقصده سيادة اللوا اتصل ب 747120 إذاعة تكسب معانا جوايز قيمة