مصر مقاس مين

طلعت حملة ايمن نور ردا على حملة جمال مبارك
و الدكتور ايمن اطلق على حملته لقب مصر كبيرة عليك ,, قاصد بيها جمال مبارك و طبعا طلع علينا كاتب صحفي قام ضاربله طبق كشري و مفتتح مقاله بالجملة البديهية "و كبيرة عليك انتا كمان يا دكتور ايمن" , طيب هيه مصر مش كبيرة على مين؟
يعني مثلا هل تعتبر كبيره على نور ولا صباحي ولا البرادعي, عايزين نعرف مصر مش كبيره على مين, فى المواقف اللى زي ديه اللى فيها محتاجين لاجابات تحدد مصير بلد بحالها, التصرف المنطقى ان احنا بنلجأ لحكماء و عقلاء الوطن ,, اللى هما انا يعني من الاخر , فهتخيل الجماهير الغفيره واقفه على بابي و بتقولى مصر مش كبيره على مين يا عمدة, و هنا اخذ العمدة رشفة من كوب السحلب, يستحضر بها برهة صمت و تدبر ليرد على سؤال الشعب ,, مصر مش كبيره على مين؟
نفرد السؤال, رئاسة مصر على مقاس مين ,, من ضمن المتنافسين المتوقعين فى سباق الرئاسة , مين فيهم مصر على مقاسه, كده السؤال بقى اوضح شويه و تقدر الجماهير الغفيره انها تلقط طرف خيط الاجابة, و الاجابة مش اسامي اشخاص ولا صفاتهم ولا اى حاجه من الكلام ده.
الاجابة النموذجية و يا ريت تكتبوها ورايا علشان لحظات اسقاط الحكمة على الجماهير الغفيره لن تتكرر كثير لانى مش فاضى (اشتريت وييي و هيه الاتارى بتاعة الايام ديه)
القصد, مصر على مقاس شخص,, اى شخص بما فيهم جمال مبارك, تنطبق عليه شروط ترشح منصفه و اتيح له المنافسه فى انتخابات حرة نزيهة, و نجح فيها.
من الاخر, مصر مقاس اي رئيس ييجي بعد تطبيق مطالب التغيير السبعة.
حضرتك مقاسك كام؟