سمير عدلي باكيا: اللي عنده كلب بيعتز بيه

أعرب سمير عدلي ، مدير المنتخبات الذي تم إقالته مؤخرًا بقرار من مجلس إدارة اتحاد الكرة ، عقب أزمة مباراة السنغال الأخيرة، التي تم إلغائها في أبوظبي، عن استيائه الشديد وغضبه مما فعله مسؤول الجبلاية بحقه، والتصريحات التي ترددت على لسان محمود الشامي، عضو المجلس، بأنهم يقوموا حاليًا بتنظيف اتحاد الكرة.
وقال سمير عدلي منفعلا وباكيًا على الهواء ببرنامج بالورقة والقلم الذي يقدمه إسلام صادق على قناة النهار الرياضية، الثلاثاء: «إذا كان ده كلام محمود الشامي يبقى عيب، إحنا لو شغالين خدامين الناس بتقولنا شكرًا، اللي عنده كلب بيعتز بيه، وأنا مش ها رد وهافضل محترم نفسي لغاية ما أشوف نهاية المواضيع دي، وحقي هايجيلي لحد عندي الأدبي قبل أي حاجة تانية».
وتابع: «مش هعادي حد ولا هاغلط في حق حد، لأني راجل مؤدب ومحترم ومحترف، أنا خدمت في الاتحاد مدة كبيرة وبحترم الناس كلها وبعرف حدودي وعارف شغلي ووضعي ومبعملش حاجة غلط، وبطالب وزير الشباب انه يطلبني يحققوا معايا، وبتكلم عن أنور صالح ، رجل محترم وزي أخويا، وحققنا بطولات كبيرة مع الأهلي والمنتخب».
وأضاف: «اشتغلت مع 22 مدرب وجهاز فني ومئات اللاعبين، بطالب وزير الشباب انه ينظف اتحاد الكرة والنائب العام ينظف اتحاد الكرة ورئيس الجمهورية ينظف اتحاد الكرة كافية فساد وبوظان، كل الناس عارفة الغلط فين والكل ساكت»
وواصل: «هاخد حقي ومش هاسيب حقي أبدًا، ومفيش حد يملك انه يبطلني كرة القدم إلا لما ربنا ياخدني بس، وانا نفسي راجل واحد من الاتحاد يقولي ليه اتشلت من مدير منتخب مصر ، ولغاية دلوقتي المشاكل موجودة وكلها إدارية اسألوا اللاعيبة والجهاز والمشرف بيشتكوا أد إيه. أنا مخدتش جنيه واحد مكافآت. بسافر كل ماتشات أهلي وزمالك ومنتخب، اسألوا الإدارة المالية في الاتحاد، اتصالاتي كلها على حسابي الخاص دولي ومحلي علشان أوفر مباريات واتفاقات».