شوبير يفتح النار على الاهلى ويؤكد : احترموا نفسكوا

شن أحمد شوبير، هجومًا حادًا على أعضاء مجلس إدارة النادي الأهلي.
وطالب شوبير - في تصريحات إذاعية - منذ قليل - مجلس إدارة "القلعة الحمراء"، توضيح الأسباب التي تمنعه من الموافقة على إلغاء روابط الأولتراس في مصر، التي تقدم بها مرتضى منصور رئيس لجنة الأندية.
وقال: "أنتوا خايفين من إيه، أنتوا اللي دلعتوا الجمهور بالطريقة دى، وخليتوه يتنطط علينا، مفيش حاجة اسمها أولتراس في مصر لازم كل دة يتلغي، ومفيش حد فوق القانون".
وتابع: "يعني إيه عضو مجلس إدارة يقول جمهوري خط أحمر، ما جمهورك دة اللي جاب القتل والخرطوش والفوضى في الملاعب، إنتوا مبتتعلموش من أخطاء اللي قبلكوا ليه؟ المفروض نحترم أنفسنا بقا ونحترم مناصبنا".
وأضاف نجم منتخب مصر السابق: "رئيسك دلوقتي قاعد في البيت بسبب الجمهور، اللي أنت بتدافع عنه، الجمهور اللي دخل الملعب وعلق لافتات مسيئة لسيادة المشير والمجلس العسكري واللي بيحكموا دلوقتي".
واختتم شوبير تصريحاته: "أي شخص من هذه الروابط يخرج للتظاهر، يسجن فورًا، لأنه مش هيبقى معاه تصريح للمظاهرة، إحنا هنرجع الفوضى تاني! لازم تخلصونا من المشاغبين دول وتقبضوا عليهم كلهم".