رسائل من وحى الإسبوع الرابع

- محمود الخطيب : مازالت عبق زهرة ذكرياتك السعيدة فى قلوب الأهلوية تفوح كلما أطللت علينا ، متعك الله بالصحة والستر يا أسطورة كل الزمان.

- إسكندرية : دلوقتى عرفت الألتراس بيعملوا شماريخ ليه ؟ علشان تتنقل المباريات الإسكندرية ويكسب الأهلى !!

- محمد شوقى : هو إنت كل ماتش مع الإتحاد تتصاب !! ألف سلامة ، بس الماتش الجاى مع الإتحاد ما تلعبوش !!

- عفروتو : لما تطلع بعد المباراة تقول فى قناة ميلودى سبورت إن إنتم عارفين إنكم هتتغلبوا من قبل ما تلعبوا بسبب الحكام!! يا بنى عيب عليك مش تاكلك أكلة سمك تقوم تنسيك أكل العيش والملح والنجومية اللى اخدتهم فى الاهلى عيب ..فعلاً إنت خليفة ابراهيم سعيد .

- منتخب مصر : قرعة أمم أفريقيا كانت متوسطة ، فأوقعتك مع أفريقيا ( الوسطى ) !!

- النادى الإسماعيلى : أعتقد أنكم الفريق الوحيد فى العالم اللى بيتحسب له كل مبارة ضربة جزاء !!هو إنتم مشترطين على الحكم الموضوع دا السنة د ولا ايه !!

- الحكم محمد فاروق : ما هو يا تتعالج عند طبيب نفسى من عقدة ضربة جزاء تريكة اللى حسبتها غلط فى ماتش الحدود من 5 سنين ، يا بلاش تحكم للأهلى تانى ، مش كفاية ماتش انبى اللى فات فى الكاس .

- الحكم توفيق السيد : يعنى تقعد تصرخ سنة بكاملها وتقول مظلوم ووقفنى ظلم ، وأول ماتش ليك تظلم الداخلية !! دا إنت كان لازم تروح فى البوكس !!

- الكابتن طلعت يوسف : إحنا عاوزين نستمتع بفريق المصرى ياريت تستقر على تشكيل واحد ، انت معاك لاعبين حريفة وادارة سخية وجمهور متحمس ، يعنى مالكش حجة !

- أيمن حفنى : والله انت فى رأيى لاعب غير عادى ومظلوم إعلامياً بدرجة كبيرة ، لمساتك تنم عن مهارة غبر إعتيادية لاتقل عن أحرف لاعبى مصر المشهورين ، ولو تواجدت فى نادى كبير ستصبح رقم 1 فى مصر بلامنازع .

- أتليتكو مدريد : بصراحة كان فريق جيد الموسم الماضى وكان به أجويرو وفورلان ، بس لما تركوه ، ما بقتش أعرف ولا لعيب مشهور فيه ، هو مش ممكن ييجوا سلف ماتش المئوية ويرجعوا تانى فرقهم الجديدة !!

- أحمد حسن : مش فاهم على أى أساس قلت إن الزمالك أحسن فريق فى مصر !! دا كل اللى لعبتوه 3 ماتشات منه ماتش مع المحلة بمساعد تحكيمية فاضحة ، وتعادل مع الجيش وأداء سيىء ، والفوز على أضعف فرق الدورى الانتاج !! يعنى ملعبتوش مع فرق جامدة فى الدورى علشان تقول كدا، الا لو كانت حركة تملق منك لجماهيرالزمالك !!