يتشرف "ستاد الاهلى " ان ينقل لمحبى الاهلى فى كل مكان واحدة من اروع ما كتبت احدى المدونات المصريات فى اطار حمله التدوين اليوم خلال شهر يونيو التى نادى بها المدونين احد اسباب وعوامل ثورة 25 يناير عن النادى الاهلى نادى القرن فى افريقيا والوطن العربى تحت عنوان " يعنى ايه بتشجع الاهلى " بقلم "رحاب الخضري" صاحبة مدونه"فتافيت ربع قرن" يعني إنت من المحظوظين في الأرض،، بتشجع فريق كرة قدم صحي،، ضد الضغط والسكر والشلل الرعاش! * يعني توقعاتك للماتش تكون غير أي مشجع تاني هما بيتوقعوا مين اللي هايكسب،، لكن أنت بتتوقع الأهلي هايدخل كام جول،، لأن المكسب ده بديهي! * يعني تشجع الأهلي وأنت حاسس بالوحدة العربية لأن الأشقاء العرب بيشجعوه معاك ،،! * يعني لو حظك مش تمام وماقدرتش توصل البيت أو الاستاد في الميعاد،، مش محتاج تتصل بحد تسأله عن النتيجة،، كفاية تعد كام مرة مصر كلها بصوت راجل واحد،، صرخت وقالت جول! * يعني لو قاعد مع حد بيحكي لك عن أمجاد فريقه وإنه مرة خد الدوري،، تعرف إنه من العصر الحجري! * يعني وقت ماتش الأهلي،، تلاقي مصر كلها بقت استاد كل الكافيهات والقهاوي،،، والورش والمحلات،، مشغلة الماتش حتى في الشارع تلاقي ناس مطلعة التليفزيونات! * يعني تشجيعك للأهلي وطنية،، عشان أصلا جمهورية مصر أهلاوية،، بنسبة 90% وال 10%،، فرق أخرى! * يعني لما واحد من الزمالك يحب يفكرك بأمجاد فريقه سنة 44،، كفاية إنك تبص له وتقول: خدوا 6 رايح،، جابوا 4 جي! * يعني لو حد زملكاوي في الشغل معكنن عليك معاك مفتاح عكننته،، وهي واحدة بيبو وبشير،، بيبو والجون وتكسر سمه للأبد! * يعني أغاني الألتراس تعلمها لولادك،، لأنها لها فوايد كتير جدا جدا: - بتعودهم على الجرأة،، والصدق قول الحق،، خليك جريء النادي الأهلي،، أحسن فريق! - بتعودهم على الأصل،، ووقفة الرجالة أووو أوو أوووو،، جمهورالأهلي دا حماه أووو أوو أوووو،، على الحلوة والمرة معاه عمرى ما أحب غير الأهلي ولا فى غيره يفرحني! - بترفع من روحهم المعنوية،، وبتأكد ذاتهم قوم يا أهلاوي،، وأحكي على الأنجازات ميت سنة،، مليانة بطولات! - بتنمي جواهم الروح الوطنية،، والثورة بيقولوا أشمعنا أحمر،، سؤال بيسالوه أرجعوا للتاريخ،، لو كنتوا تعرفوه الأحمرهو معدن،، المصري الاصيل في الثورة الدم كان،، على الصدور يسيل! * يعني بتشجع فريق،، الألتراس بتاعه متميز الكل يعمل دخلات اشتغالات،، إلا الريد ديفل يدخلوا بدخلات للمثقفين فقط،، وكلها حقائق تاريخية! * يعني تبقى قاعد كافي خيرك شرك في المدرج وإذ فجأتن تلاقي لاعب (مستوي زيادة) وقالع جزمته ورافعها،، ويقولك والنبي والنبي،، أنزل رقعلي صداغي بيها! * يعني تاخد حسنات لو أتفرجت على ماتش للفرق التانية عشان طول ما أنت قاعد تتفرج،، بتحمد ربنا وبتقول: الحمد الله الذي عافنا مما ابتلاهم به،، وفضلنا على كثير ممن خلق تفضيلا،،! ولو ما تفرجتش برضو بتاخد حسنات،، عشان أصلا المشجعين ف الفرق التانية بتشجع الأندية بتاعتهم بشتيمت الأهلاوية،، وإحنا ناخد الحسنات والدوري برضو! * يعني الأهلي في أسوء حالاته يلاعب فريق تاني في أحسن حالاته،، ولما يتعادل معانا مديره الفني يقول،، لقد عاد فريقي بقوة لأن التعادل معانا شرف مش أي حد ينوله! * يعني أنت مشجع طيب وابن حلال،، فحتى القلة المندسة من الفرق الأخرى،، بتهتف ليك الشعب يريد،، الدوري يا عميد،، العميد أحمد حسن طبعا! * يعني يصعب عليك الحكم اللي بينزل يحكم أي ماتش للأهلي،، عشان الكل بيتهمه بالإنحياز بس ده لإن قوة استعابهم صعب عليها تسوعب إن فيه فريق لا يقهر،، ودايما كسبان! * يعني الناس الحاقدة من كتر جهلها،، تشبه الأهلي بالحزب الوطني،، مع إن جمال وعز زملكاوية والساحر أبو تريكا إخوان!! * يعني تكون فودافون هي الراعي الرسمي للأهلي ويكون الشعار بتاعها،، القوة بين إيديك!! * يعني بتشجيعك للأهلي،، بتأكد أسس المجتمع المصري الدين لله،، الوطن للجميع،، والدوري للأهلي!
