شعبان عبدالرحيم: هند صبري هتمثل معايا في فيلم عن قصة حياتي وقضية الحشيش بمشاركة أولادي الخمسة.. واللي فاضي من الفنانين وعاوز ييجي ييجي

· هي جت عليا أنا يعني ما العالم كلها بتعمل أفلام عن قصة حياتها
· كان نفسي داود عبدالسيد هو اللي يخرج الفيلم عشان الراجل ده عمل مني ممثل جامد في فيلم «مواطن ومخبر وحرامي»
سيدخل وأولاده الخمسة قريباً تصوير فيلم «هي جت كده» والذي يتناول فيه قصة حياته: شعبان عبدالرحيم يتحدث إلي «صوت الأمة» في هذا الحوار عن كواليس الفيلم مؤكداً أن هذا العمل هو أهم عمل في حياته ولذلك رشح لاخراجه ثلاثة مخرجين في وقت واحد.
صرحت من قبل بأنك ستقدم فيلماً سينمائيا تحكي فيه قصة حياتك وفجأة توقف المشروع، ما الأسباب؟
قلت كده بس رجعت في كلامي علشان لقيت لسه فيه حاجات جديدة بتييجي علي قصة حياتي فلازم أخدها معايا في القصة عشان كده قلت استني شوية أصلي لو عملتها من غير ما استني الحاجات الجديدة هبقي كده بقول للناس إني خلصت وأنا لسه مخلصتش.
أحداث جديدة علي حياتك مثل ماذا؟
يعني زي حكاية دخولي المستشفي وقضية تعاطي الحشيش.
متي تبدأ؟
إحنا بنحضر الورق وهيكتبه إسلام خليل والمخرج سيكون داود عبدالسيد أو سعيد حامد أو أحمد البدري.. بس أنا كلمت أحمد البدري وهو قالي ماشي.
وما دور داود عبدالسيد وسعيد حامد؟
بصراحة كان نفسي داود عبدالسيد هو اللي يخرج الفيلم عشان الراجل ده عمل مني ممثل جامد في فيلم «مواطن ومخبر وحرامي» بس أنا مش لاقيه خالص.
وما هي أبرز أحداث حياتك التي يتعرض لها الفيلم؟
مثلا لما سكنت أنا ومراتي وعيالي في 14 أوضة صغيرة في مدة 14 شهر وكنت كل شهر بعزل في أوضة ولما سافرت من مصر للمنصورة علي عجلة.
كيف سافرت كل هذه المسافة علي «عجلة»؟
كنت هربان من الحشيش والحكومة كانت بتدور عليا فقلت أهرب من غير مواصلات عشان ما اتمسكش فركبت عجلة وبقيت أقف في كل بلد شوية لحد ما روحت المنصورة بس في الآخر سلمت نفسي.
من رشحت من أولادك ليشارك في الفيلم؟
كلهم.. العيال كلها هتعمل دوري وأنا لسه صغير، أنا عندي كل المقاسات عدوية ابني الصغير هيعمل دوري وأنا صغير وسيد هيعمل دوري لما كبرت شويه وعبدالرحيم وخميس وعصام وبعدين هطلع أنا بقي
من أين جاءت لك فكرة تحويل قصة حياتك لفيلم؟
هي جت عليا أنا يعني ما العالم كلها بتعمل أفلام عن قصة حياتها.
من يشاركك في بطولة هذا الفيلم؟
صلاح عبدالله وهند صبري والباقين اللي فاضي وعاوز ييجي يتفضل ييجي.
ما هو تفاصيل الدويتو الذي سيجمع بينك وبين المطرب أبوجريشة؟
قصة الدويتو خناقة بيني وبينه علي إحياء فرح وكتبه إسلام خليل.
وماذا تقول كلماته؟
الحقي ياست عيشة الحق ياعم علاء، شعبولا وأبوجريشة نازلين في بعض خناق، وبعدين أنا هرد وأقول: أبوجريشة مين ياعم أبو 45 الغنا مش ناقص هم دا العالم تعبانين.
يتردد أن هذا تقليد منك لعدوية ورامي عياش؟
لا والله أصل الفكرة دي كانت عندي من زمان بس أجلناها شوية.