ننشر نص المكالمات الخارجة لنقيب الأطباء علي أحدث «سي دي» لفضائح رجال الحزب الوطني

· حمدي السيد: إحنا مش عربجية وبتوع العلاج الطبيعي « شوية حوش» بياخدوا كارنيه النقابة
· «ملعون أبوه علي أبو سنينه وأيامه السودة .. ومحدش يفعص في صدر واحدة ست ويعمل دكتور »
من «سي دي» صغير تفوح رائحة فضيحة جديدة لأحد قيادات الحزب الوطني والذي طالما حظي باحترام المعارضة قبل الأغلبية، إنه حمدي السيد نقيب الاطباء الذي أقحم نفسه في معركة كلامية مع أخصائيي العلاج الطبيعي متهما إياهم بالنصب وممارسة مهنة الطب دون ترخيص.
الطرفان «السيد» ونقابة أخصائيي العلاج الطبيعي تبادلا الاتهامات بتوجيه شتائم مقزعة وبذيئة في هذه المعركة أنكرها كل طرف علي حده.
بينما حصلت «صوت الأمة»علي نسخة من «سي دي» يتم تداوله ويحمل صوتا مشابها لصوت «السيد»، وهو يجري بعض المكالمات التليفونية ويتلفظ خلالها بشتائم وعبارات مسيئة لاخصائيي العلاج الطبيعي.
المكالمات المسجلة علي ال«سي دي» تمت فيما يبدو من الاسماء بين «السيد» ووكيل مدير مستشفي السنبلاوين وأحد أطباء المستشفي وتتضمن ألفاظا خارجة اكتفينا هنا بنشرها حرفيا دون تدخل.
د. عبده: ألو دكتور حمدي السيد؟
النقيب: أيوه
د.عبده: دكتور «عبده بلال» نائب مدير إدارة مستشفي السنبلاوين.
النقيب: أيوه
د.عبده: أنا يابيه عندي مشكلة.
النقيب: كلمني يا ابني علي النمرة الارضية عشان أسمعك أحسن «22900026».
د.عبده: شكراً.
في المكالمة الثانية:
د.عبده: ألو.. مع حضرتك عبده بلال، حضرتك أنا عندي مشكلة في المستشفي ومش عارف آخد قرار أنا والمدير كان فيه اتنين من بتوع علاج طبيعي جايين جديد والدكاترة بتوع الروماتيزم مرضيوش يتعاملوا معاهم وضربوهم.
النقيب: من همه ؟
د.عبده: اتنين صغيرين تعيين جديد جايين بجواب تعيين من الوزارة، وأنا أشرتلهم ونزلوا تحت شدوا في الكلام مع بتوع الروماتيزم لأني حولتهم علي قسم الروماتيزم لأن حضرتك عارف اني معنديش علاج طبيعي وفي 7 دكاترة بيشتغلوا طب طبيعي وروماتيزم وتأهيل.
النقيب: أنت عندك أجهزة علاج طبيعي.
د.عبده: أيوه عندي.
النقيب: ودول المفروض مش بتوع أجهزة وللا جايين عشان إيه؟
د.عبده: همه جايين لي بقرارات وشوية ورق بقرارات فصل من المديرية ومدير إدارة العلاج الطبيعي الدكتور «فتوح» كلمني مرتين وهو مستاء جدا من اللي حصل لهم وقعد يقرأ لي شويه قوانين منهم القانون 3 لسنة 85 إن فيه فصل إداري وفني وقرار وزير الصحة وكلام من ده وحضرتك هما دلوقتي معتصمين ومضربين عن الطعام وأنا مش عارف أعمل إيه دلوقتي حضرتك.
النقيب: أنت عندك القانون بتاعهم ولا معندكش؟
د. عبده: مدير الإدارة..
يقاطعه النقيب: قرأته؟
د.عبده: أيوه.
النقيب: لقيت فيه إيه؟
د.عبده: لقيت إن القانون 3 لسنة 85 مش عارف أخصائي العلاج الطبيعي يقيم ولازم يفحص الحالةويكتب البرنامج وإلايبقي فيه فصل فني وإداري.
النقيب: مين يا ابني اللي قال الكلام ده انت بتألف؟ انت شفت الكلام ده فين؟
د.عبده: مدير إدارة العلاج الطبيعي بعتهولي.
النقيب: من قال الكلام ده.
اقرأ الكلام اللي عندك كويس وهات القانون رقم 3 لسنة 85 واقرأه.. مفيش كلام من ده فصل فني وإداري! مينفعش وظيفة أخصائي العلاج الطبيعي هو الآتي ان المريض متحول إليه متشخص من الطبيب.
د.عبده: أعمل إيه يافندم في الجماعة بتوع الروماتيزم اللي عندي؟
النقيب: انت لازم تاخد الإجراءات اللازمة وميصحش الضرب احنا مش عربجية ولا عواطلية ولاشوارعية عشان نستخدم الضرب عيب.. أنت تحقق معاهم، لكن عملية العمل بتاعهم.. فصل بين الفني والإداري ده غير قائم هو دوره الفني إيه.. لازم تقرأ القانون عشان تعرف واحنا باعتين لوكيل وزارتك قرارات وجوابات، نمره 1 حذار أن الولدين دول حد فيهم يعلق يافطه مكتوب علي صدره دكتور لان ده مخالف لقانون مزاولة المهن الطبية اللي بتقول لايجوز لأي انسان أن يستخدم لقب طبيب أو يستخدم لقب يوحي له بالحق في الكشف علي المرضي إلا ويعتبر مزاول مهنة الطب بدون ترخيص.
د.عبده: يافندم..
النقيب: «منفعل» اسمعني للآخر.
د.عبده: حاضر يافندم.
النقيب: نمرة 2 القانون هو في المادة 8 بتقول لايجوز لأخصائي العلاج الطبيعي أن يفحص الطبيب أو يطلب أبحاث أو يكتب تقرير إنما تجيله الحالة متشخصه ومطلوب لها العلاج وهو عليه أن يضع البرنامج.
د.عبده: هما عايزين يلبسوا البالطو الابيض يافندم؟
النقيب: يلبسوا البالطو الابيض ويكتبوا علي صدرهم «أخصائي علاج طبيعي» مش دكتور زي كارنيه النقابة اللي «مجموعة حوش» بيعملوه وتيجي تبص علي الكارنيه بتاعهم تلاقي مكتوب عليه دكتور وده مخالف للقانون 3لسنة 85 مع مراعاة القانون 145 لقانون مزاولة الطب.
د.عبده: يعني أنا محطش في دماغي قرار المحكمة العليا اللي جايبينه لي بتاع لقب دكتور.
النقيب: لا مفيش حاجة اسمها المحكمة الإدارية العليا الكلاه ده كلام فارغ وغير صحيح والوزير محضر جواب هيبعته لكل الاقسام.
د.عبده: يعني أنا أقف لزمايلي وما أكتبش ليهم لقب دكتور زي ما أنا كنت هاعمل؟
النقيب: «منفعل» مفيش حاجة اسمها دكتور انت ترضي ان واحد واخد 4 سنين دراسة علي شوية آلات وأجهزة يسمي نفسه دكتور.
د.عبده: لا يافندم.
النقيب: والمريض هيعرف الدكتور من اللي مش دكتور ازاي وممنوع عليه أن يكشف علي مريض.. اقرأ المادة كويس لايجوز انه يكشف علي مريض.
د.عبده: يعني أعمل لهم أوضه لوحدهم؟
النقيب: اعمل اللي تعمله لكن البالطو عليه ورقة «أخصائي علاج طبيعي» فلان.. حذاري أنك تكتب دكتور لأنك كده تبقي مشارك معاه في الجريمة عقوبتها السجن سنتين.
د.عبده: أنا واقف مع زمايلي.. ابعت لي ياباشا الورق لأن الجماعة بتوع الروماتيزم والتأهيل حاطيني في موقف لاأحسد عليه أنت عارف حضرتك المرضي بيطلبوا بتوع العلاج الطبيعي بالاسم وأنا موقفي وحش والعيال بتوع العلاج الطبيعي جايين بيعاملوا الحالات حلو والحالات بتشكر فيهم أوي وبيشكو من بتوع الروماتيزم.
النقيب: ممنوع يكشف علي المريض وأقعد مع دكاترة العلاج الطبيعي عشان لو هايدافعوا عن حقوقهم يبقي بالاحترام وأخلاق الدكتور مش العربجية ومد الأيد والضرب ده كلام لايقبل وانت لازم تكون حازم في ده.. قولهم النقيب بيقولكم عيب ميصحش إحنا دكاترة ودي مهنة محترمة وهو في نهاية المطاف اسمه«باراميديكال» يعني مساعد للطبيب ولابد أن يكون هذا هو الوضع.
د.عبده: يعني القوانين والورق اللي عندي وأحكام المحكمة الادارية ملوش.. «يقاطعه منفعل».
النقيب: كل الكلام ده كلام فارغ لامحكمة إدارية تقدر تآخد قرار ده قانون اقرأه ازاي يديله دكتور انت تقبل علي روحك الكلام ده واحد ياخد 4 سنين دراسة وانت تتقور عينك 7 سنين علي ما تآخد دبلوم أو ماجيستير أو غيره ويبقي في الآخر هو اسمه دكتور وانت اسمك دكتور انت تقبل الكلام ده ولا مدير المستشفي يقبل علي نفسه الكلام ده.
د.عبده: لا يافندم.
النقيب: واللي يقول معاه قرار محكمة إدارية «يبله ويشرب ميته» ايه الكلام ده هي المهنة هانت علي أصحابها كمان يا أستاذنا.
د.عبده: ماشي يافندم.
النقيب: انت تقبل هذا الوضع.. طيب الممرضة أولي بأنها تسمي نفسها «دكتورة» اللي أفضل منه و«اللي ضفرها برقبة 100 واحد زيه» بتسمي نفسها دكتورة؟!
د.عبده: أنا قلتله لما قعدت معاهم علي موضوع «هتك العرض» والكلام اللي حضرتك قلته.
النقيب: حضرتك كلمني بكره الصبح أنا ابعت لك صورة من قانون مزاولة مهنة الطب اللي بتقول لايجوز لأي إنسان أن يعطي نفسه لقب طبيب أو اللقب اللي يوحي بأنه طبيب أو يكون له الحق في الكشف علي مرضاه ولايعتبر مزاولاً لمهنة الطب بدون ترخيص ودي عقوبتها سنتين و200 جنيه غرامة من سنة 1954 ودلوقتي الغرامة 20 ألف جنيه.. كلمني عشان لو في نمرة فاكس ابعت لك القانون 3 لسنة 85 واقرأه والمادة 8 واقرأه بالتفصيل.
د.عبده: اللي خلاني أكلم حضرتك انك كنت بتتكلم في الفضائيات بطريقة ناعمة وهادي مش بالطريقة الخشنة اللي بتكلمني بيهادي دولوقتي وانك تراجعت عن حكاية «هتك العرض».
النقيب: أنا تراجعت عن إيه؟
د.عبده: عن هتك العرض.
النقيب: لا أنا متراجعتش عن هتك العرض.. أي واحد يعاقب للكشف عن استخدام مهنة الطب بدون ترخيص ويعتبر هتك عرض سيدة يعني لما انت تكشف صدر سيدة وتحسس عليه وانت ملكش ترخيص بذلك ده اسمه في القانون هتك عرض.
د.عبده: خلاص أنا اسف علي ازعاج حضرتك.
النقيب: ليس لأحد أن يعري ست أو يكشف عليها إلا إذا كان عنده ترخيص والترخيص الوحيد المسموح به هو للطبيب يا ابني.
د.عبده: يافندم احنا كلنا هنا ماشيين بنفس حضرتك.
النقيب: احنا عايزينكوا تحافظوا علي كرامتكم وكرامة مهنتكم وبلغ بتوع العلاج الطبيعي اني منزعج جداً وآسف إن طبيب يستخدم ايده في الدفاع عن حقه وإذا ثبت ان في حد مد إيده وقع عليه عقوبة ولماحد يكلمك قول له ده نص القانون اللي أنا بنتمي إليه وإذا كلمك الدكتور «عبدالكريم» خليه يكلمني.
د.عبده: دكتور عبدالكريم مبيكلمنيش وحاطط ايده في الميه الباردة.
النقيب: «منفعل» لاميحطش إيده في الميه الباردة ومتخليش بتاع العلاج الطبيعي يكلمك.
قوله من فضلك متكلمنيش انت ملكش أي سلطان عليا وانت لست طبيب عشان تكلمني اللي يكلمني رئيسي.. وهو ملوش لازمة وملوش حق يكلمك وإحنا باعتين جوابات بأن موضوع الفصل بين العلاج الطبيعي والروماتيزم لم يحدث به أي قرار وهو موظف إداري مش طبيب وانت لايتحدث معك إلا طبيب مثلك وإذا كلمك قول له من فضلك متكلمنيش خلي الريس بتاعي«الطبيب» يكلمني أنت تكلم الريس بتاعي وهو يكلمني إنما هو يتجرأ ويتطاول ويكلم مدير المستشفي أو وكيل مستشفي ويديله تعليمات «يا أخي ملعون أبوه علي أبو سنينه علي أبو أيامه السوده اللي بنشوف فيها الخلق المتدنية دي» واسأل عليه أصلا هتلاقيه كان بتاع تربية رياضية أو بتاع أي حاجة وحليت العملية عليه في غيبة من الزمن أو غفلة من الزمن.
د.عبده: خلاص أكلم حضرتك بكره.
«مكالمة أخري»
د.عبدالمحسن: ألو السلام عليكم دكتور «حمدي السيد» الدكتور عبده لسه مكلمني بسبب الجماعة الاثنين اللي جايين لينا جديد معاك الدكتور عبدالمحسن صادق مدير المستشفي احنا نتصرف ازاي في الموقف ده.. الجماعة بتوع العلاج الطبيعي اللي جايين جايبين قوانين وقرارات كتير.
النقيب: دول بيضحكوا عليكو.
د.عبدالمحسن: القوانين إللي جايبينها..
النقيب: سيبك من القوانين دي معندهمش قوانين انت عندك القانون 3 ده القانون الوحيد والباقي كله مش عارف يقولك فتوي من إيه كل الكلام ده كلام «هلس لايعتد بيه» اقرأ القانون من فضلك.
د.عبدالمحسن: هو بيتحوله يادكتور وفي البداية هو مش هايعرف يعالجه إلا لما يقيم ويبتدي يشتغل عليه.
النقيب: مبقولشي يقعد «يفعص» فيه ولا يكشف صدر ست عشان يكشف عليها مش هقول يقيس الضغط ولا يمسك سماعة في رقبته ولا يمد إيده عليه إلا أنه يبدأ بعمله «ميزوتبرابي» أو أكتيف «ميزوتيرابي».