طالب الدبلومة الامريكية المتهم زورا بالبلطجة يكشف طرق تعذيب الناشطين والأطفال على ايدي الداخلية

"شهادة احاسب عليها يوم القيامة " بهذه العبارة بدأ " ايهاب مصطفى عاطف الشوبكي" الذى جاء ذكر اسمه في الفيديو المنتشر على اليوتيوب و الفيسبوك بأسم "المقبوض عليهم فى أحداث الشغب بالدقهلية"
يقول" الشوبكى " : انا شاب مصري من المنصورة ساكن بقرب المحافظة و عندي 18 سنة ...طالب 3 ثانوي في الدبلومة الأمريكية , اللي حصل معايا اني يوم الثلاثاء 26/2/2013 الساعة 7:20 بالظبط كنت معدي من بيتي اللي عند بنك القاهرة و رايح لصاحبي اللي ساكن في عمارة الصباحي في اول قناة السويس...و كان معايا شنطة فيها مذاكرات SAT2 ( مادة خاصة بطلاب الدبلومة الأمريكية).. و طبعا دي مش مسافة مستاهله اني اركب مواصلات ...عديت من جنب سور المديرية القديمة .. لقيت ناس بتجري و وراهم الامن المركزي... قولت اكيد لو وقفت مكاني محدش هيقول اني مع المتظاهرين يعني...بس بردو لقيت كام واحد اتلموا حوليا و ابتدوا بالضرب منهم ناس لابسة ملكي و اتحطيت في مدرعة و بردة اتضربت جواها..لحد ما تقريبا مش حاسس باللي حوليا و لما فوقت لاقيت نفسي مرمي جوا المديرية القديمة مع 3 اشخاص بس ... و استقبلني الظابط شريف ابو النجا الغني عن التعريف بقلة الادب و الالفاظ القذرة و الضرب و الاهانة بعد ما اتاخد مني موبايلي و بطاقتي و كل ممتلكاتي .. كان لسة مفيش احداث حصلت ساعتها...لما بدأت الاحداث تحصل على حوالي الساعة 8:40 في نفس اليوم بدأ الناس الممسوكين يدخلوا علينا واحدة واحدة بينهم موظفين حكومة و اطفال معدوش ال 12 سنة لحد ما وصلت الساعة 2:30 فجرا و كان عددنا 18 واحد... ناس جاتلها وسايط و طلعت و اتبقى مننا 13 واحد ..و انا شخصيا معرفتش اتصل بأهلي و أعرفهم انا فين...الساعة 3:30 تم وضعنا في مدرعة و نقلنا لمكان معرفوش بس هو كان حجز... لما طلع علينا الصبح يوم الاربعاء 27/2/2013 عرفت اننا في قسم طلخا لأن كان قدامي في شباك الحجز مكتوب على المبني اللي قصادي "تأمينات طلخا" ... أول مادخلنا للقسم دة استقبلنا ملازم اسمو شريف بالضرب عن طريق انه يخلي وشنا في الحيطة و يخبطنا على راسنا من ورا فا دماغنا تخبط في الحيطة... و تهزيق و قلة أدب فوق الحدود .... و خلى طفل اسمو السيد عبد الحميد و طفل اخر اسموا اسلام جاد موجودين بالفيديو بمسح حمام الزنزانة... و صورنا الفيديو المحطوط على اليوتيوب واللي اكيد كلكوا شوفتوه وصلنا للساعة 8 الصبح و ال18 شخص قاعدين مستنين حد يجيلنا عشان نروح النيابة..و استنينا لحد الساعة 1 الظهر في يوم الاربعاء 27/2/2013 و روحنا النيابة عشان نلاقي اهالنا مستنينا هناك...و تم عرضنا على وكيل النيابة و هو مستهتر جدا بمناظرنا لأن مفيش حد من بين 13 عندوا اي سابقة ولا حد مشتبه به و اغلبنا من الاطفال.. و طبعا كلنا في النيابة اعترفنا على الظابط شريف ابو النجا و الملازم شريف بقسم طلخا ... و خصوصا الملازم شريف... و لما المحامين قالولنا اننا هنبات يوم كمان في الحجز , رجعنا قسم طلخا و كان الاطفال مرعوبين من الملازم ...بس فوجئنا لما رجعنا انه مكانش موجود و كان في ظباط تانين هم الموجودين و عدى يوم الاربعاء بسلام لأن الملازم شريف مكانش موجود.. بس وأنا قاعد في الحجز بليل سمعت صوت أمي بتتخانق برة مع العساكر و تقولهم ابني مظلوم و عايزة اقابل مأمور القسم ... و بالفعل دخلت لمأمور القسم العميد / عماد الخولي و هو راجل في قمة الاحترام بحيث انه نداني انا كمان من الحجز و دخلتلوا انا و أمي و سألني "انت طاهر دلوقتي" رديت "طبعا طاهر و بصلي الفرض بفرضه جوا الزنزانة كمان" ... فأداني مصحف حلفت عليه انا الضرب اللي فوشي من الظابط شريف...حلفت من غير أي تردد...و رجعت تاني للحجز و فوجئت انه سمح لنا بدخول الاكل و الشرب و البطاطين و السجاير كمان...و عدا اليوم دة عشان نصحا على الخميس 28/2/2013 و نلاقي الوقت بيعدي ساعة بساعة ...خفنا اننا ناخد 4 استمرار ... و خصوصا انا... فأتصرفت بأني اقف عند شباك الحجز و أنادي حد من الماشيين برة و أمليه رقم أمي و يكلمها ..و ساعتها عرفت ان في كفالة 1000 جنيه و أن الاهالي راحت تدفعها .. و على الساعة 3:50 طلعنا وقفنا طابورين و اتنادى على 5 مننا و اخدوهم في مكان تاني و اتبقينا 8 اترحلنا لقسم تاني في المنصورة و نطلع من هناك و لسة في قضية يوم 15/3/2013 و يوم الجمعة 1/3/2013 لما اتكلمت مع واحد من صحابي بيقولي العيال اللي معاك اغلبهم اطفال..فابقولوا عرفت منين... لقيته باعتلي لينك يوتيوب قي الفيديو اللي صورهولنا الملازم شريف في القسم تحت أسم "المقبوض عليهم في أحداث الشغب" و صفحات الفيسبوك تقول علينا بلطجية و اللي تقول دة احنا حافظين كلام و اللي يقول دول بتوع حمدين و اللي يقولك دول مش عارف ايه و اي هري...و كل اللي اقدر أقوله " حسبي الله و نعم الوكيل في البلد و اللي خلاها كدة" و احب افهم الداخليه اللي فاهمه انها كدة هتخلي الناس ماتنزلش من بيوتها... انتوا كدة بقى بتدولها سبب تنزل بيه من بيوتها.