نجوم الغناء يكسبون نجوم الكوميديا

بالبلدى

انتهي موسم أفلام الصيف واللي كانت نتيجته أن نجوم الغناء فازوا علي نجوم الكوميديا في تحقيق إيرادات أعلي، فقد حقق تامر حسني وهيفاء وهبي 45مليون جنيه وحقق نجوم الكوميديا الثلاثة عادل إمام وأحمد حلمي وأحمد مكي - الثلاثة حققوا - 45مليون جنيه وكده يكون نجوم الغناء فازوا علي نجوم الكوميديا، وعايز أقول للكابتن حسام البدري: إنت فيه حد سلطك علي النادي الأهلي ولا إيه ياكابتن حسام، فيه مثل بالبلدي بيقول «إللي تغلب بيه إلعب بيه» وإنت دلوقتي عايز تطبق طريقة لعب جديدة كانت نتيجتها كلها هزائم في المباريات الودية والهزائم، لأن لاعبي الأهلي لم يستوعبوا الطريقة الجديدة للكابتن البدري الذي أدعوا الله له بالهداية مع بداية شهر رمضان.
وأقول للإخوة المسيحيين كل سنة وأنتم طيبين بمناسبة عيد ميلاد السيدة العذراء مريم آل عمران، سبحان الله السنة دي يوم ميلادها هو الجمعة المواكب لهلال أول رمضان، علشان كده نهنيء الإخوة المسيحين والمسلمين ويارب الناس إللي بتنفخ في موضوع الفتنة الطائفية يهمدوا ويسكتوا لان المصريين طول عمرهم عايشين مسلمين ومسيحيين ماتعرفش تفرق مين المسيحي ومين المسلم وكل سنة وأنتم طيبين.