محمد عبد اللطيف عن قرار العربي بالمدارس الدولية: ليه تحكم على مستقبل ابنك؟

تحدَّثَ محمد عبد اللطيف، وزير التربية والتعليم والتعليم الفني، عن قرار تدريس مادتَي اللغة العربية والتاريخ في المدارس الدولية، قائلاً: "مفيش قرار في الوزارة لا يتم عرضه على المركز القومي للبحوث عندنا، وبنتكلم في 120 دكتور كلية تربية، والمجلس التنفيذي، ماعندناش قرار فردي، القرارات كلها درسناها على الأرض، التعليم جوه الفصل مش في الوزارة".

جاء ذلك خلال لقاء وزير التربية والتعليم والتعليم الفني، اليوم الثلاثاء، رؤساء تحرير الصحف والمواقع الإلكترونية.

وأضاف الوزير أن "القرار يطبق على الذي سيدخل الإعدادية هذه السنة، وأن العربي والتاريخ جوه المجموع، وده بعد 4 سنين، والموجود أن العربي والتاريخ بيتم تدريسهم، كل اللي عملناه إنهم جوه المجموع".

وتابع عبد اللطيف: فيه مشكلة الناس بتعملها في أولادها ومش واخدة بالها، إنهم مايدرسوش عربي، حضرتك حكمت عليه مايشتغلش صحفي ولا محامي ولا ضابط، وحكمت عليه يشتغل في شركة دولية، ويفضل متواصل في العمل ده طوال حياته، إيه الميزه إنه يروح شركة دولية؟! هيسيب ابن بلده وييجي لحضرتك؟!

واستكمل الوزير: "واحد العربي بتاعه ضعيف، وبيتواصل بلغة أجنبية، هيشغل المصنع إزاي؟ هل اللي عملناه مش موجود في أي بلد في العالم؟! طب الناس اللي جاية من بره؟ قدّم على إعفاء وما عندناش مشكلة".

وقال محمد عبد اللطيف: "أكبر مستهدف لنا في المرحلة المقبلة أن نحل الكثافات والعجز ونقضي على بعبع الثانوية العامة، فيه مرحلة لاحقة هنكمل إن يبقى الثانوية العامة موضوع هادي، ومايبقاش فيه استنفار إن فيه طالب موجود في الثانوية العامة".

وتابع عبد اللطيف: "غيرنا لائحة الانضباط أيضًا، وقابلة للتنفيذ داخل المدرسة؛ عشان نرجع الانضباط، وعملنا مجموعات التقوية بشكل جديد في المدرسة".