محمد أبوالحسن: ساعدت عادل إمام كثيرا.. ولم يحفظ الجميل!

«طفشني» من مدرسة المشاغبين خوفا من موهبتي

·
الزرقاني طرد الدمرداش لأنه تأخر .. دلوقتي النجم بيضرب المخرج علي قفاه!
علي الرغم من أن فترة غيابه عن الساحة الفنية طالت أكثر من اللازم، إلاأن شعبيته ودرجة حب الجمهور له لم تتأثر وسيظل.مصنفا في ذاكرة الفن المصري كواحد من أشهر وأبرز الكوميديانات وأعمقهم موهبة. إنه الفنان الكبير محمد أبوالحسن
ماهي أبرز ذكرياتك عن الماضي وزمن الفن الجميل؟
أنا فاكر أستاذي عبدالرحيم الزرقاني لما طلبني في مسرحية وكنا شغالين في البروفات معاه وبعد ما دخل وقفل الباب، دخل علينا نور الدمرداش وكان وقتها نجم كبير جدا لقيت الأستاذ عبدالرحيم عنفه وطرده قائلا : مهما كانت نجوميتك لازم تحترم مواعيدك وأنا لما أدخل محدش يدخل ورايا.. يعني كان في ضبط وربط وإلتزام ودلوقتي النجم ممكن يضرب المخرج علي قفاه أمام «الكاست» كله وميقدرش يفتح بقه بكلمة.
هناك كوميديانات كثيرة جدا اسقطوا سياسيا في أعمالهم الفنية من خلال تعديلات قاموا بها بنفسهم وأبرزهم عادل إمام.. فما الفرق إذن؟
- الفرق إني راجل لايعرف الكذب أوالنفاق وكنت بقول للأعور إنه أعور في عينه.. وعادل إمام تحديدا هو أكتر واحد أنا مديت له إيدي وساعدته في بداية مشواره، إحنا الاتنين خريجي كلية زراعة ..أنا جامعة عين شمس وهو جامعة القاهرة بس أنا كنت سابقه بسنتين وكنت بكتب وبخرج إسكربتات وقتها لما اتعرفت عليه وكنت أعطيه أدوار اشتغل بيها وساعدته كثيرا في ظهوره وللأسف لم يحفظ خالص جميلي عليه وصدمني فيه لأنني بعدها كنت بلاقي ناس تتصل بي وتباركلي وتقولي جالك دور مع عادل إمام «إبسط ياعم» وأكتشفت بعد كدة أنه بيتعرض عليه كشوف الممثلين اللي هيشتركوا معاه في العمل وفيها اسمي وكان بيشطبني منها كده من غير سبب وده طبعا بعدما بقي «الزعيم» زي ما بتقولوا عليه.
هل حدثت بينكم خلافات جعلته يتخذ منك موقفا؟
- لاهو من البداية ده موقفه مني ..أنا كنت مترشح لدور في مسرحية مدرسة المشاغبين في بداية التجهيز لها وقابلته علي باب مسرح الفنانين المتحدين فنادي علي وسلم علي غير العادة ولما عرف مني إني مترشح للدخول معاه قالي بالحرف الواحد: ياراجل دي مسرحية وحشة أوي وطالع فيها والله أنا لومش موجود في الفرقة لكنت سبتهم ومشيت.صدقته وخدت كلامه بنية سليمة ولكني اكتشفت كدبه علي لما المسرحية اتعملت ونجحت وعرفت إنه طفشني منها لأنه كان عارف إني بكسر الدنيا علي المسرح وكان خايف لاغطي عليه.