هيثم عرابي يعلق على أزمة «متعب» مع «زيزو»

علق هيثم عرابي مدير التعاقدات والعلاقات الخارجية السابق في النادي الأهلي على أزمة عماد متعب مهاجم الأهلي مع مديره الفني عبدالعزيز عبدالشافي في مران اليوم.
كان متعب قد دخل في مشادة قوية مع زيزو بسبب إشتباك الأول مع صالح جمعه، وهو ماتسبب في طرد متعب خارج المران، وتغريمه 150 ألف جنيه إضافةً إلى إستبعاده من مباراة القمة يوم الثلاثاء المقبل.
وكتب عرابي عبر حسابه الشخصي على «فيس بوك» ": "اللي يقولك إن اللاعيبة ما بتقراش اللي بيتكتب على صفحات الأهلاوية على الفيسبوك أو في الإعلام أو مش متابعين متصدقش .. اللاعيبة بتقرأ كل كلمة وبتشوف كل حرف بيتكتب ومتابعة كل شيء.. موضوع عماد متعب وصالح جمعه والكابتن زيزو بسيط وبيحصل في كل الأندية.. والمخطيء ف الآخر بيتحاسب.. عماد متعب لاعب محترم جدا وتاريخه طويل وكلنا عارفينه".
وتابع: "صالح جمعة عنده حماس شديد وعاوز يكون له دور في الفترة اللي جاية وده حقه.. الكابتن زيزو أنا واثق مليون في المائه إنه قادر يدير المركب وإنه يعالج الأخطاء ويتعامل مع أي حد يخرج عن النص مهما كان الاسم مين لأن مفيش حد فوق العقاب لو أخطئ عندك ماتش مهم جدا وعلى أساسه هتتحدد حاجات كتيرة وبالتالي دورنا حاليا إننا مانكبرش الموضوع ونسيب المسئول عن الفريق يحلها ويعاقب المخطيء ونقف مع فريقنا في ماتشه الجاي , بالتوفيق للفريق إن شاء الله ف ماتش القمة وماتنساش إنك مابتشجعش أشخاص.. إنت بتشجع الكيان وبتحافظ عليه وخاصة في أي موقف صعب أو وقت حرج وكل حاجة ولها وقتها مفيش حد فوق النقد ولكن الذكاء في امتى تعمل ده عشان تكون بتساعد فريقك".