رباعيات المونديال

ياما نفسي يوم تتحقق في عمرنا الآمال
ويلعب منتخبنا الكسيح لو ماتش في المونديال
وكالعادة الجبلاية يبعت برقية تهنئة للريس
ويقوله بتوجيهات فخامتك كان الماتش سجال
وعجبي
من غُلبنا ادّمنا الفرجة على كاس العالم في القهاوي وبقت هي متعتنا
لو نقضيها من الزحام واقفين نشجع اي فريق يلعب ضد ضرتنا
نزعق بعلو الصوت شوط ياحمار حرقت دمنا الله يحرقك
وفي الآخر نكتشف ان جرسون القهوة ضحك علينا وكروتنا
وعجبي
شِمتنا في طواحين الهوا لما اتبعتروا من هولندا
طب احنا عملنا إيه؟ بيتهيألي الأحسن نفرد التندا
نداري خيبتنا القوية لاودي ولا رسمي فالحين
ده آخرماتش دولي كسبناه كان مع الجوهري سنة تسعين على اسكتلندا
وعجبي
وآدي الكاميرون ياعيني شربت من الكاس ذاتو
وسلم لي على الكومندا الرقم عيسى حياتو
ايش اللي وداك ياصعلوك بين الملوك
خير ماسويت يامنتخبنا انك كنّيت لإن اللي اختشوا ماتو
وعجبي
الخمسات والأربعات من غير عدد نازلة ترف
بيتهيألي لو في تمرين حيكون عددها أخف
فشر ماتشات الكورة الشراب في حارتنا
الناس دول وصلوا كاس العالم ازاي ياريت نعرف؟!
وعجبي
وفي التحكيم ياريت يكون في كل ماتش من الحكام عشرين
حكم لكل لاعب وبرضو كل دا مش حيعجب المغلوبين!
لكن ولا الحوجة لخالتي تكنولجا اللي مالهاش قلب
الغلطة منها بفورة تضيع نتيجة الماتش ولا ترحم المظلومين
وعجبي
ونفسي ومنى عيني اسمع جماهيرنا في روسيا وهمه بيغنوا لما يفرحوا
قاعدين ليه يا بتوع الارجنتين ماتقوموا تروحوا
حتى لو قالوا: ياميسي روح حصالتكوا انفتحت !!
وياريت نتعلم ازاي الناس بتشجع فرقها من غير مايشطحوا.
وعجبي