نشطاء فيسبوك يقصفون «إم بى سى» فى عقر دارها بسبب «وش» محمد سعد

• مطالبات بمنع عرض البرنامج.. وتهديد بمقاطعة القناة بعد حلقة هيفاء
بعد الحلقة الأولى من برنامج «وش السعد» على قناة ام بى سى مصر، اشتعلت مواقع التواصل الاجتماعى، وشهدت رد فعل اغلبه ساخط على محمد سعد وعلى العرض الذى اتهموه بالاسفاف المبالغ فيه.
الطريف ان اهل السوشيال ميديا قاموا بقصف جبهة سعد وام بى سى فى عقر دارهم فى الصفحة الرسمية على موقع الفيسبوك للبرنامج، فبعد الحلقة مباشرة طرح ادمن الصفحة سؤالا حول رأى الناس فى الحلقة الاولى، وكانت الاجابة ان انهالت التعليقات الغاضبة من وش محمد سعد ومن القناة على حد سواء، حتى ان البعض طالب بمقاطعة القناة وعدم متابعتها بسبب ما اطلقوا عليه اسفاف ومسخرة لا تليق بالقناة الكبيرة.
وخلال الساعات الاولى لطرح هذا السؤال شهدت الصفحة تعليقات وصلت إلى ما يقرب من 80 ألف تعليق، رصدنا بعضا منها، مثل تعليق حسين ايوب والذى قال فيه: «برنامج وش السعد اللى قناة MBC مصر مصدعنا بيه لما يبان من البرومو ان البرنامج كله قايم على ان محمد سعد بيهزق نفسه وعمال يتحرش على الهوا دا يبقى اسمه استخفاف بعقولنا، عشان شوية فلوس مرمية فى الهوا مش عارفين تعملوا بيها حاجة، والشباب هيموت على شبه فرصة بتكلفة اقل من كده بكتير، أى حشو فى دماغ الناس وخلاص، مهو للاسف التافهين كتير».
وقال أحمد عبدالرحيم: «نطالب من قنوات mbc بوقف برنامج وش السعد لمحمد سعد نهائيا لأن به اسفاف وتفاهة واستخفاف بعقول المشاهدين وليس به أى رسالة هادفة والا سيتم مقاطعة كل المنتجات التى تقدم إعلانات بالقناة، الناس اللى عايزة تنهض بالاعلام المصرى بجد تنشر معايا عشان نوصل صوتنا لكل الناس».
اما غادة خالد فقالت: «يعنى قلت مش هحكم على برنامج محمد سعد من الاعلان، وقلت هديه فرصة اول حلقة عشان ياخد حقة بس بجد ندمانة جدا انى ضيعت وقتى فى أتفه حلقة شوفتها فى حياتى، الحلقة كلها عبارة عن فساتين عريانة ومحمد سعد مش على بعضة، بجد فاشل، حاجة قرف بجد انتو لو قاصدين تخسرو مش هتعملوا كده».
وعلقت غادة الغندور على الصفحة فقالت: «يا خسارة عليك يا محمد يا سعد كنت بحترمك وبحب تمثيلك نزلت وحقرت من نفسك جدا جدا».
ووجهت رسالة لمحمد سعد قائلة: «فوق قبل ما الناس تكرهك انت محبوب، ألغى البرنامج التافه اللى مفيش فيه ضحك ولا ضيوف محترمين حتى، وmbc مصر بقت بتستهبل، بلاش ترخصوا نفسكم عشان الفلوس. الفلوس هتروح وهيبقى السمعة الوحشة والعمل الغير صالح».
وقالت غادة السيد محمد فى تعليقها: «والله أنا قريت كل التعليقات يمكن ألاقى تعليق واحد بس بيشكر فى الحلقة بس غريبة مفيش حاجة بيتفق عليها الناس كلها أى حاجة بتتعرض فى التليفزيون بيبقى ليها محبين ومعترضين وكارهين بس سبحان الله انى مشفتش ولا أى حد قال أى كلمة كويسة عن البرنامج، يبقى كدة إجماع انه بجد البرنامج ملوش أى لازمة برنامج بيستخف بعقولنا وبيعلم ولادنا قلة الحيا، أنا عن نفسى بحب قناة mbc مصر فيا ريت بإجماع التعليقات على فشل البرنامج تبطلوا تعرضوه، لان اسم المحطة يحمل اسم مصر فلازم تحافظوا على صورة مصر.