خالد أبو النجا ينعي شقيقته في تدوينة طويلة: «البقاء لله.. البقاء للحب»

نعى الفنان خالد أبو النجا، شقيقته الراحلة سلوى أبو النجا على مدونته، والتي قضت نحبها في حريق التهم شقتها بالزمالك.
وقال أبو النجا في نعيه لأخته: «سلوي أختي أجمل بنت في مصر.. البقية في حياتكم»، موضحا أنه كان في مطار في اليونان عندما تلقى مكالمة هاتفية من أخيه طارق، يخبره فيها بمصرع شقيقته، قائلا له: «سلوى ياخالد.. خطفها حريق النهارده.. لما رجعت بنفسها داخل الحريق.. بيقولوا في محاولة عشان تنقذ قططها».
وعن ذكرياته مع أخته الراحلة، ذكر خالد أبو النجا بعضا منها، قائلا: «كأنه امبارح لما كنت "دودي" أخوها الصغنن اللي ماسك إيديها، وسلوى واخداه معاها النادي يتفرج علي تدريباتها أو ماتشاتها في الباسكت والهاندبول في نادي هليوبوليس أو تاخده معاها مع الفريق في سفريات حول العالم. كنت أخوها الصغنن "دودي" اللي ماحدش يعرفه وكنت باسمع كل التعليقات اللي بتحسدها على جمالها وحبها والتزامها الرياضي، دايماً فخور بيها زي كل إخواتي الكبار.. كلهم.. فخور بيهم.. كلهم رياضيين.. كلهم جمال.. كلهم يشرفوا مصر كلها.. وغالبا كانوا السبب إن أنا كمان حبيت أكون زيهم».
ويمضي أبو النجا في الكتابة عن أخته: «سلوى أبوالنجا.. بطلة الهاندبول والباسكيت.. أجمل واحدة شفتها في حياتي.. اتخطفت.. مش بس الموت اللي بيخطف.. الاكتئاب بيخطف.. بيخطف عشان الناس بتخذلنا فبنوصل لدرجة إن مافيش بكرة نصحى له.. الحزن بيخطف عشان بنحب ناس بيتغيروا وبيبقوا ناس تانيين! الحزن بيخطف عشان بيحبنا ناس زي ما كنا في يوم بس إحنا بنتغير و بنكبر ماحناش زي ما إحنا اللي حبوهم! الندم بيخطف.. الندم على قرارات في حياتنا لو ماتصالحناش معاها بيخطفنا.. حياتنا بتتخطف مننا.. بالتدريج.. كده في لحظة.. كل الوقت.. كل العمر.. كله بيخلص!».
ويحكي أبو النجا تفاصيل الحادث كما عرفها، قائلا: «حريق في بلكون الشقة يوم 20 يوليو 2015
الساعه 4 العصر تقريبا.. نجلا وسلوى لما اكتشفوا الحريق وحاولوا السيطرة عليه فتحوا باب البلكونة ليمتد الحريق للشقة كلها للأسف.. وبعد ما تنقذ سلوى ونجلا.. لكن ترجع سلوي للحريق
باين عشان تنقذ قططها، فتختنق سلوي من دخان الحريق مع القطط».
وفي كلمات مؤثرة، يكمل أبو النجا تدوينته: «مش بس الاختناق اللي خطف سلوي ولا بس القطط ولا بس الإكتئاب ولا بس الندم ولا بس الحزن اللي خطف سلوي مننا كلنا.. غالباً.. الخوف! الخوف علي القطط اللي بقت أهلها، الخوف من بكرة بلا أمل، الخوف من الناس اللي بلا قلب».
وكأنه ينقل وصية غير رسمية لشقيقته الراحلة، قال خالد: «سلوي أختي سامعها بتقول.. يادودي.. ماتزعلوش.. أنا باحبك يادودي.. باحبكم كلكم.. القطط ونجلا وسيوفة وطروقة وهشومة وسمسمة وكوووولكم.. وبطل موضوع الخطف ده يا ولد.. أنا مع مامي.. وها نبعت لكم من الجنة حضن وبوسة كل يوم بدل الصور اللي كنت بابعتها لكم كل يوم وأدوشكم بيها.. بس عندك حق يادقدق.. مش قادرة أقول هتوحشوني.. عشان كنتم واحشيني أصلاً.. خلوا بالكوا من بعض.. مالكوش غير بعض.. مامي قالتها.. وأديني أنا كمان أهو باقولها.. باحبكوا».
وأنهى خالد أبو النجا تدونيته الطويلة قائلا: «البقاء لله.. البقاء للحب».
جدير بالذكر أن سلوى أبو النجا لقيت مصرعها أمس، إثر اندلاع حريق بشقتها بالزمالك، في محاولة منها لإنقاذ قططها التي تعيش معها في المنزل.
اختي الحبيبة سلوي أبو النجا .. أجمل واحدة في مصر.. تعيشوا انتوا.. البقاء لله.. البقاء للحب.. http://t.co/Cr5AG9Rqxm pic.twitter.com/Irz7BvgBQO
— Khaled Abol Naga (@kalnaga) July 21, 2015
اقرأ أيضا:
تشييع جثمان شقيقة خالد أبو النجا من مسجد عمر بن عبدالعزيز بمصر الجديدة
إنقاذ 19 قطة في حريق شقة «سلوى أبو النجا».. ومنظمات حقوق الحيوان تنعيها