بالفيديو.. «الإخوان يشاركون» و«اللي عايز السيسي يقول نعم» و«نعم طريقك للجنة» .. التوك شو والاستفتاء

سبعة أيام فقط تفصل المصريين عن لحظة الاستفتاء على الدستور الجديد. وعلى طريقة اللافتات المنتشرة في ميادين مصر، انتقل المشهد إلى برامج التوك شو، وأصبح المذيعون ينافسون الضيوف في تقديم رؤيتهم الخاصة حول الاستفتاء.
بعضهم قال: "صوِّت بنعم"، والآخر قال: "فكر قبل ما تصوّت"، بينما ربط آخرون مسألة التصويت بمرشح الانتخابات الرئاسية القادمة.
الإخوان هيشاركوا في الاستفتاء على الدستور
إبراهيم عيسى مقدم برنامج «25/ 30» على «أون تي في»، كان غاضباً أثناء تعليقه على موقف الإخوان من الاستفتاء على الدستور، وقال: «الناس دلوقتي هتقول الإخوان داعيين للمقاطعة على الدستور.. ده وهم وكذب زي بالضبط البوسترات اللي مكتوبة في الشوارع، وشعارها قاطعوا الدستور الدموي.. لكن الحقيقة غير كده خالص».
وأضاف: «الإخوان لا يمكن أن يقاطعوا الدستور على الإطلاق، وهيشاركوا إما سبب إعلانهم المقاطعة عشان يبرروا بعد كده لو حصل إن نسبة من التصويت كانت نتيجتها «لا» يكون رد فعلهم على طول: «شوفوا كل ده واحنا مقاطعين التصويت كمان أمال لو كنا شاركنا»، واختتم حديثه قائلاً: «الإخوان والمنساقون وراءهم من السلفيين هيصوتوا بلا، ما عدا قيادات حزب النور اللي اندمجت في الحياة السياسية وكارهة الإخوان».
تقولوا «نعم»
أحمد موسى بدأ برنامج «الشعب يريد» على فضائية «التحرير» بهذه العبارة: «أنا هاقولها كلمة واحدة لازم تنزلوا وتقولوا نعم للدستور، وهاقولك ليه حضرتك تقول نعم.. لأنك انت نزلت يوم 30 عشان تسقط مرسي، وتمنح تفويض للجيش والشرطة لمواجهة العنف والإرهاب، وبالتالي إذا صوت بكلمة «لا» يبقى انت عاوز مرسي والإرهاب يرجع من جديد".
فكر قبل ما تصوت
تامر أمين، اختار هذه الجملة شعاراً له في برنامجه «ساعة مصرية» على قناة «روتانا مصرية». قال «تامر»: بعد إعلان عدلي منصور عن الاستفتاء يبقى كده احنا دخلنا في الجد".
طرح «تامر» سؤالين: الأول لازم تفكروا على أي أساس هتقرر المقاطعة أو المشاركة، والسؤال الثاني بناء على إيه لو شاركت أقول «نعم» أو «لا».. لازم يبقى عندي أسئلة ومعايير، وبالتالي ابني موقفي عليها، لكن مش أمشي مع القطيع، اللي يقول «نعم» قول «نعم» معاه، أو أشوف الناس اللي بتقول «لا» لمجرد كلمة «لا».. ده كلام الفاشلين.
قول «نعم» وانت مغمّض
رولا خرسا مقدمة برنامج «صدى البلد» لخّصت رأيها في جملة واحدة: «لو مش عاوز الإخوان قول نعم».
وقالت «رولا»: الإخوان خدعونا سنين كتير بالكلام عن الصندوق والديمقراطية وعشان كده لازم ننزل ونشارك.. وطالما الإخوان قاطعوا الدستور يبقى لازم تتأكد إن الدستور ده في مصلحتك، وتنزل وتقول «نعم» وانت مغمض.
وأضافت «رولا»: كفاية إنهم دفعوا 10 مليون جنيه عشان يطبعوا دستورهم المزور، واللي مش عاوز الإخوان ترجع للأبد لازم ينزل ويشارك.
أفضل دستور اتعمل في مصر
عبدالرحيم علي مقدم برنامج «الصندوق الأسود»، قالها بحسم وهو يدعو المصريين للتصويت ب«نعم» في الاستفتاء الذي وصفه بأنه «عرس مصري».
وفي إضاءة خافتة تنم من اللحظة الأولى عن طبيعة برنامجه تابع حديثه قائلاً: إن «التصويت على الدستور والمشاركة الإيجابية هيخلينا نعدي تلت المسافة نحو الديمقراطية».
وأضاف: «زي ما أقسمنا إن الإخوان يخشوا السجون قبل 30 يونيو أدعو المصريين للتصويت ب«نعم» على الدستور الجديد، حتى لا تعود خفافيش الظلام مرة أخرى، ونستكمل خارطة الطريق».
«نعم يعني تخش الجنة»
عمرو أديب مقدم برنامج «القاهرة اليوم» على «أوربت»، قال في إحدى لحظات انفعاله المعتادة: «الناس كلها هتقول نعم للدستور في حد عنده شك في الكلام ده؟».
وفي إشارة للإخوان سأل أديب: «إنت فارد عضلاتك ليه؟ الاستفتاء بتاعك حصل على 32%، وزي ما انتم قلتم التصويت على الدستور ب«نعم» هيدخل الجنة، أنا بردو بقول وفقًا لكلامكم التصويت على دستور 2014 ب«نعم» هيدخل الجنة».
اللي عايز السيسي يقول «نعم»
عماد أديب مقدم برنامج «بهدوووء» على فضائية «سي بي سي»، اعتبر أن «الفشل في المشاركة سوف يُنذر بعواقب وخيمة على الانتخابات الرئاسية، والحقيقة أن الدستور بروفة اختيار رئيس الجمهورية القادم، وبناءً عليه هيقرر «السيسي» اللي انتم عاوزينه النزول من عدمه».