بالفيديو.. (الشروق) تنشر شهادة طبيب في مستشفى المطرية حول أحداث البلطجة

تلقت "الشروق" عبر بريدها الإلكتروني، شهادة من أحد الأطباء العاملين بمستشفى المطرية (طبيب امتياز)، مرفق بها مقطع فيديو، يوضح أحداث البلطجة التي شهدتها المستشفى، وموقف الشرطة من هذه الأحداث، خاصة وأن المستشفى شهدت عملية قتل لأحد المصابين..
وجاء نص الرسالة على النحو التالي:
في عز النهار
في القاهرة
في المطرية
جه اتنين.. ومعاهم ناس..
واحد منهم ضارب واحد ضرب يموت..
وبردو التاني ضربه لكن مش ضرب موت..
الاتنين جم عشان يتعالجوا..
أهل القتيل عرفوا الموضوع..
والشرطة أخدت خبر..
جت الشرطة.. وجت طليعة بلطجية من أهل القتيل..
بعد ما الشرطه جت و"خبت" القاتل..
وبعد عمليات الترويع اللي قام بيها البلطجية..
جت تعزيزات من البلطجية واقتحموا المستشفى... بيدوروا على القاتل..
احتلوا المستشفى كلها.. والأمن مضربش طلقه.. ولا قبض على واحد منهم
على الرغم من إنهم كلهم ماسكين أسلحة..
كنا في الدور الرابع.. نزلت أشوف فيه إيه اتضح أن فيه "هجوم" ع المستشفى
.. وشوفت دكتور ممسوك بطريقة مهينة وحواليه بلطجية بيقولوا له "فين الواد"
قصدهم القاتل اللي الشرطة خبته.
طلعت جري الدور الرابع تاني.. طلبت من زمايلي محدش يخرج من الأوضه..
سمعنا صوت خبط شديد في المستشفى.. وأخيرا سمعنا صوت بلطجية بيتحركوا في الدور الرابع وبيدوروا في كل أوضه ع القاتل..
لقوه في عمليات الطوارئ..
اللي في الدور الأرضي..
بعد ما لقوه..
"شرحوه"!!
شرحوه والأمن شايف..!!
آخر خبر وصل لنا أنه مات..
وأخيرا جت الشرطة والجيش.. جم بعد ما خربت مالطة.. جم بعد ما جم ومشيوا لما لقوا البلطجية.. جم وبيعلوا صوتهم.. أول ما جت عربية الجيش سألت أعلى رتبة فيهم.. أنت جاي ليه دلوقت؟؟ سكت ومردش.. الدكتور النايب بيقول لاللواء حضرتك الأمن مش كافي فبيقوله أنت عندك 4..
وبعدين نده النقيب فقاله آه والله يا باشا أربعه وكمان همه اللي بيختاروهم.. كان واضح أن الباشا بيتكلم بطريقة غير مناسبة للموقف..
فروحت بعديها!!
طبيب امتياز.. مستشفى المطرية