القارئ حاتم سعيد يكتب : بيزنس الثورة

سمعنا زمان وفي العصور اللي كان فيها حروب عن أغنياء الحروب وطبعاً المصطلح إتشهر كتير جداً في فترة بعد الحرب العالمية الثانية و خصوصاً في مصر , ما علينا ده مش موضوعنا أهي معلومه كده ع الماشي ... المهم بقي بعد نجاح الثورة بنسبة أنا يعني شايفها كبيرة ( لأني متفائل شوية ) وجه دور أمثالي من اللي غاويين كتابة ورغي في المتابعه وملاحظة الأمر الحالي واللي الناس وصلت ليه إكتشفنا حاجات كتير غريبة أكيد هيجي وقت أكلمكم عنها لكن الشيء إللي إستفزني فعلاً بيزنس الثورة وطبعاً ده مصطلح من أنا إخترعته إيه بقي بيزنس الثورة ده ....؟!!!
قبل ما دماغك تسرح وتفهمني غلط إني هقول أي حاجة .. إسمع يا سيدي إكتشفنا إن في ناس كتير مكنوش موجودين في الهوجة إللي حصلت أساساً وإعلاناتهم التجارية وشغلهم كان شبه واقف لقيناهم جايين لينا بحاجات غريبة أولها مثلاً لحاف الثورة ...!! وهو لحاف علي شكل علم مصر وتضغطي إنت بقي وتعيش في حب مصر .. ومتسألنيش أتغطي إزاي بلحاف وشهر أربعه دخل وبدأ فصل الصيف يكشر عن أنيابه ....؟
بس بجد شهاده لله الممثل إللي قام بالإعلان فنان رائع كمية إستفزاز وإستخفاف بعقول الناس غير طبيعية ويقولك إيه بقي أنا عامل إعتصام تحت اللحاف لحد ما مراته ترحل ...!!!!؟؟
طب نقولك إيه بس ... معتقدش في الموضوع أي شيء كوميدي وتكملة لمسلسل بيزنس الثورة وفي جولاتنا المعهوده بوسط البلد وحواري القاهرة خد عندك أمثلة كالأتي : عربية سندوتشات 25 يناير ...!!!
كبابجي الثورة ......... فطارطي ثورة مصر ...!!
ولهذا الحد وصلنا إننا بنقلب عيشنا في أي حاجة وأي زيطة صدقت يا عم سيد حجاب والله ... وتسأل أي حد من دول يقولك ده إن دل علي شيء فإنه يدل علي وطنيتي ....!!!!!
أسيبكم بقي ولينا أكيد كلام تاني لأني رايح تحت اللحاف بس مش لحاف الثورة ... لحاف بيتنا !!!!