رسالة من جندي مجند عصام الورداني لأم عصام (قصة قصيرة)

أمي الغالية أم عصام
ازيك يا أمه، وازاي أخواتي، أنا بدي اطمنك أني كويس يا أمه، واطمن إخواتي بعد المشكل بتاع النهارديه، مع أني مش عارف ان كنت كويس ولا لأ ربنا يستر
أصل النهارديه خدمتي في القطاع جت علي المضرعه، وحطوني علي الآلي اللي في الفوهه. وساجوا بينا بتاع ساعة مل المعسكر لحد لما لجتنا في ميدان الجيش اللي في وسط السويس، فرحت، وقلت حلو ليه نصيب اشوف اخواتي عبد الهادي ومنصور ومحمد ووولاد أخوالي سعيد ورضا وأشرف وعتمان، ومش بعيد اشوف خالي رفعت راجع من علاج الكيماوي ولا حتي خالي نبيل ولو أني عارف انه تعبان لكن قلت يمكن يكون رايح يغسل الكلي واشوفه .
وجفنا يا أمه والدنيا هاديه. الباشا الضابط بعت زميلي حنا للبجال اللي علي الميدان يجبله سجاير، جمت اديته نمر المحمول بتاعت أخواتي لجل ما يكلمهم ويكلم اخوالي اشوفهم وبالمرة يجيبولي لقمة، بس الواد رجع وجالي صدجني الشبكة واجعه يا عصام، و جالي يا عصام ياخويا الناس متجمعين بالألوف بره وجيين علينا. وشوية والباشا آل كله ياخد موجعه، طلعت من الكوة اللي في سجف المضرعه لجيت نمل يا أمه جاي علينا، حضرت الآلي وتممت عليه لجل ما اضرب علي الكفره اللي الباشا دايماً يجولنا انهم عايزين يولعوا في البلد.
من بعيد يا أمه سمعتهم بيجولوا” حسني بيه يا حسني بيه كيلو العظم بعشرة جنيه”، هو صحيح يا أمه بجي بعشرة جنيه؟ ديه كان بسبعة عامناول، وبعدين جالوا”يا نظيف يا نظيف مابقاش معانا تمن الرغيف”، هو الواد مصطفي لسه بيوجف علي طابور العيش يامه؟يا امه لسه صغير، هيموت في الطابور زي اخويا فرج ما دهسوه في الطابور. الكفرة جريوا ياأمه علينا وبجوا يجولوا”يا ريس إحنا زهقنا مالبطالة ومالشحاته”، ألا يا أمه هو عبد الهادي ومنصور لاجو شغل ولا لسه بيسرحوا في مينة السويس؟ طب ومحمد لاجا شغل في أمن الجرية السياحية بتاعت راس البر؟صبريه ياأمه بكرة يفتحوا تعينات النيابة والجضي ويبجي جاضي أد الدنيه، ديه اول دفعته. جريوا يا أمه الناس علينا و جالوا ” مش لاقين الدوا مش لاقين علاج والوزرا مصيفين علي البلاچ”، ألا هو لسه الداكتور محددش العملية بتاعت خالي رفعت؟ ده عنده بسم الله الرحمن الرحيم المرض اللي ما يتسمي، هيستنوا عليه لما ينتشر في جسمه؟ والكيماوي هيعمل ايه غير انه ياكل في عظمه، يا أمه خليه يبيع الفدان ويعمل العملية في الخصوصي ، شوية والنمل بجي أدام الكردون ولاجتهم بيجولوا ” يا جمال قول لابوك احنا عشنا باقت ضنك” ، سرحت يا أمه في البت فاطمة، داني كاتب عليها من ست سنين ولا عارف اجبلها حتي أودت نوم، بعد ما الجرشين راحوا علي المحامي اللي قومناه يجيب حج ابويه من بتوع الجطر اللي ولع بيه . الناس يا امه عدوا الكردون ولاجيتهم بيجولوا”يابو دبوره يابو كاب إحنا اخواتك مش إرهاب” جلت والله صح، ماهو همهم همنا آهه، آمال الباشا بيجول كفره ليه؟ ما هم مؤمنين زينا أهم.
الباشا شخط فينا وجال إضرب؛ جلت يا سنه سوخه، اضرب علي دول؟شخط تاني وشتمني بيكي يا أمه، جمت حضرت الآلي ولسه هضرب استهيألي أني شفت خالي رفعت وخالي نبيل ماشين ورا الناس وببص حولين المضرعة لاجيت عبدالهادي ومنصور ومحمد ولاجيت ولاد اخوالي سعيد ورضا واشرف وعتمان؛ الباشا بيجي يصرخ ويسبلي لجل ما اضرب علي الناس، واني اجوله دول اهلي، اضرب عليهم ازاي؟ جام سبلي بالدين وبيكي يا طاهرة، ما درتش بروحي الا واني فاتح النار، وبضرب بكل عزمي وغيظي وغضبي، بضرب بحج سنين ذلي بعيد عن ارضي، بضرب بحج ابويا اللي اتحرج في الجطر وابن عمي اللي راح في العبارة واخويا فرج اللي راح في طابور العيش واخوالي اللي مش لاجين العلاج وأخواتي اللي مش لاجين شغل وأختي اللي مش لاجي استرها ومرتي اللي مش لاجي اتجوزها وانتي يا أمه اللي مش عارف حته أمنع إهانتك يا أطهر ست، ضربت وضربت وضربت لحدما ما دريتش بنفسي.
لما فجت، لاجتني في زنزانة المعسكر، وبيجولوا هيحولوني لمحاكمة عسكرية مستعجلة، ماهو حاكم الحمدلله أبنك ما ضربش علي إخواته وأخواله وأهله وناسه يامه، أني ضربت علي الباشا