«أبرزهم بيرسي تاو».. شوبير يؤكد مفاوضات الزمالك مع ثلاثي أهلاوي

كشف الإعلامي أحمد شوبير تفاصيل مفاوضات الزمالك لضم 3 لاعبين خلال الميركاتو الحالي، سبق لهم اللعب للنادي الأهلي من قبل.
ويسعي نادي الزمالك للتعاقد مع عدة صفقات من العيار الثقيل، لتدعيم صفوف الفريق الأول، قبل بداية الموسم، للعودة من جديد للمنافسة على البطولات.
وقال أحمد شوبير، في تصريحات إذاعية: «معلوماتي أن الزمالك حاليًا في مفاوضات مع لاعيبة مصريين إكس الأهلي يعني إيه؟، لعبوا مع الأهلي قبل كدا، طيب مين أبرز اللاعيبة اللي الزمالك ممكن يضمهم من الأهلي ودا طبيعي».
وتابع: «اللاعيبة هما أحمد عبدالقادر ومحمد شريف، طيب أيهما أسهل في التفاوض.، ورقيًا شريف، لأنه لاعب حر معندوش مشكلة، ولو وافق هيمضي، لكن شريف قال لا أنا مستني ومش مستعجل، وكلامه كان واضحا أنا أولوياتي النادي الأهلي وبالفعل الأهلي كان تواصل معاه، لكن الموضوع وقف بسبب السفر لكأس العالم، والطرفان ينتظران البطولة تخلص، دا بالنسبة لموضوع شريف».
وأضاف: «أحمد عبدالقادر الزمالك عايزه جدا، لعيب مهم ولعيب مراوغ وهداف، لكن لسا في وقت مع النادي الأهلي في عقده، وهيبقي مستحيل ضمه، غير في حالة واحدة وهى إن الأهلي يبيعه، ومعرفش هل الأهلي ممكن يبيعه للزمالك وإحنا وصلنا للعقلية الاحترافية دي ولا لأ، معنديش فكرة».
وأكمل: «بالنسبة لبيرسي تاو لعيب برضه مهم بس مرتبه مع الأهلي أو قطر أو لما كان في أوروبا، كان غاليا جدا، وانتشر كلام إن في أندية في جنوب أفريقيا كانت محتاجاه لكن أكتر أندية في المنطقة بتدفع هى الأندية المصرية، وبالتالي جنوب أفريقيا مقارنة بالأندية المصرية قليلة أو شمال أفريقيا».
واختتم: «بيرسي تاو معندوش مشكلة طبعا لأنه في الأول وفي الآخر هو لعيب محترف، لكن أرقامه كبيرة جدا على الزمالك، بس برضه النادي مش عايز يضم لعيبة كبيرة في السن شوية، وبالتالي فرصته قد تكون الأقل مع الزمالك مش عشان مستواه لكن زي الفلوس وزي السن.