محمود قابيل: كنا بنستنى لحظة العبور.. وحققنا نصرا يُدرس في أكبر الكليات العسكرية العالمية

روى الفنان محمود قابيل، ذكرياته مع حرب أكتوبر لعام 1973، قائلًا إن «حرب أكتوبر لم تبدأ عام 1973».
وأضاف ضمن فعاليات الندوة التثقيفية ال40 للقوات المسلحة، بمناسبة الذكرى ال51 لنصر أكتوبر المجيد، أن حرب أكتوبر تتويج لحرب الاستنزاف اللي بدأت في مارس 1969.
وأكمل: «في الفترة دي كنت برتبة ملازم أول، وقائد وحدة استطلاع خلف خطوط العدو، وزي أي فرد في القوات المسلحة كنا حاسين بألم وحاسين إننا اتظلمنا في حرب 1967، وإننا محاربناش العدو ومواجهناش العدو».
وقال: «رغم ذلك مفقدناش الأمل، من أول يوم نتدرب ونستعد للجولة التانية، أنا شخصيا اتصابت في 1967 وطلعت من المستشفى على وحدتي، وأثناء العمليات اتصابت تاني ورجعت تاني، واتصابت للمرة التالتة كان من الصعب أرجع تاني وأحيلت للتقاعد الطبي».
وواصل: «زيي زي أي فرد في الشعب المصري كنا بنستنى لحظة العبور، وعبرنا وانتصرنا وحققنا نصرا كبيرا يدرس في أكبر الكليات العسكرية العالمية، طول عمر الشعب المصري محتضن جيشه وطول عمر الجيش بيصون شعبه، ولما مرت السنين وتعرضت مصر للإرهاب الجيش كان موجود ولبى النداء وحارب وانتصر على الإرهاب وعيشنا كلنا في الأمان اللي إحنا فيه دلوقتي».
وتوجه بالدعاء إلى الله: «اللهم تقبل دعائي، اللهم أحفظ مصر، اللهم احفظ شعب مصر، اللهم احفظ قائد مصر، اللهم احفظ رئيس مصر، من قلبي يا ريس، تحيا مصر، تحيا مصر، تحيا مصر».