الرئيس السيسي عن إرسال بعض المعلمين للأكاديمية العسكرية للتدريب: لا نشكك في أحد

قال الرئيس عبدالفتاح السيسي، إن الفترة الماضية شهدت نقاشا أثير حول إرسال بعض المعلمين للأكاديمية العسكرية للتدريب.
جاء ذلك خلال فعاليات جلسة «حكاية وطن» بحضور رؤساء اتحادات طلاب الجامعات المصرية بجامعة قناة السويس، اليوم الثلاثاء.
وقال الرئيس: «إنتو بتقولوا حصل تطور كبير في مجتمعنا، جزء منه إيجابي وجزء سلبي.. المعلم اللي أنا عاوزه للمدرسة مهاراته عاملة إزاي وانتماءاته عاملة إزاي واستعداداته عاملة إزاي.. أنا مش بشكك في انتماءات أو مهارات حد».
وأضاف: «إحنا بنسلم ولادنا وبناتنا للمدير ده أو المعلم ده.. وإحنا بننتقي.. طب أنا عندي فرصة أبذل معاه جهد شوية ويمكن يبقى فيه إنفاق أكبر عليه علشان أجهزه أو أساعد في تأهيله علشان يؤدي دور أنا محتاجه».
وتابع: «إحنا تعودنا نتيجة تطور نظم وسائل الاتصال بقى دايما التليفون في إيدينا.. ودايما بنضيع وقت معاه كتير ويمكن بنسهر شوية.. طب أنا عاوز معلم يروح الساعة 6 الصبح المدرسة، فأنا بقعده 6 شهور يصحى الساعة 5 الصبح»
واستكمل: «أنا عاوز معلم يهتم بالرياضة طب هو مكنش بيلعب رياضة قبل كده.. فأنا بحطه في برنامج عام لكن الفني لا أتدخل فيه.. الفني اللي هو التخصص بتاع وزارة التعليم.. أنا بحط إطار عام لابني وبنتي اللي أنا هسلمهم أبناء مصر بعد كده».
وقال الرئيس: «لو أقدر أعمل ده في كل مؤسسات الدولة هعمله.. لأني محتاج إن الجهاز الإداري للدولة يبقى أكثر التزاما وأكثر انضباطا وأكثر تقدما وأكثر استعدادا للعطاء.. طاب أنا بعمل ده إزاي؟.. الفكرة اللي جات هي دي.. لو حد عنده أفكار أخرى يقولي عليها وإحنا نعملها».
وأضاف: «أنا أخدت المعلمين دول لمدة 6 شهور.. وأعمل لهم كل الموضوعات اللي تحقق كفاءة الاختيار ثم بنبذل جهد معاهم علشان يبقوا جاهزين من خلال التعليم الفني اللي حطته وزارة التربية والتعليم».
وتابع: «لو عندي فرصة إني أعمل كده مع المعلمين ال30 ألف لكن مقدرش؟.. أقعدهم 6 شهور كده.. أيوه.. علشان أقوله تصحى الساعة 6 وتنتبه للرياضة وتخلي بالك من الانتماء والولاء لولادنا وبناتنا لأن اللي هيقوله هيتحط في عقول أطفال صغار، ثقافتك وممارساتك هي دي اللي الطالب هيشربها منك».
واستكمل: «أنا محتاج أطمن إن تم صياغة شخصية بنقدملها ولادنا وبناتنا».
وكان الرئيس السيسي قد عقد اجتماعا اليوم الثلاثاء، مع أعضاء المجلس الأعلى للجامعات، ضمن فعاليات يوم الاحتفال بتفوق جامعات مصر.
وناقش الرئيس السيسي، خلال الاجتماع، جودة التعليم والتنافسية في مجال التعليم العالي والبحث العلمي، واستمع السيسي، لشرح من رئيس جامعة القاهرة عن الجهود المبذولة لرفع تصنيف الجامعة في المؤشرات الدولية، كما استمع لشرح من رئيس جامعة الإسكندرية عن جهود ربط البحث العلمي بالصناعة.
وكان الرئيس السيسي قد وصل إلى جامعة قناة السويس بمحافظة الإسماعيلية، وكان في استقباله رئيس مجلس الوزراء الدكتور مصطفى مدبولي، وعدد من الوزراء وكبار رجال الدولة.