منة فضالي: كنت بعوض غياب بابا بالارتباط برجالة كبيرة

قالت الفنانة منة فضالي، إنها اضطرت للارتباط برجال أكبر منها سنًا بسبب ترك والدها لها، وهي في مرحلة الطفولة.
وتابعت منة فضالي خلال لقائها مع الإعلامية أميرة بدر ببرنامج "VIP" على قناة "هي": بابا موجود ومش موجود، وكنت شايفة طول الوقت إنه مش موجود بارادته، بزعل، اتعودت أبقى قوية وإني معتمدتش على حد، وكنت بدور على الارتباط أني ارتبط بناس أكبر مني سنًا، وكنت بدور على الأب في علاقاتي، وكنت مرتبطة بناس أكبر مني ب 30 سنة، وبطلت دلوقت أدور عليه، عندي عماتي بيسألوا عليا وأعمامي بيكلموني طول الوقت ولكن مبنتقابلش باستمرار، وعندي عمة مفضلة بحبها، وعندي أخوات مسافرين برا مصر، وأخوات معرفش عنهم حاجة.
واستكملت منة فضالي حديثها: أنا كبرت وأتعودت أكون لوحدي، بعد ما كبرت حسيت إني مش خسرانة، أمي تعبت وشقيت عشان تكبَّرني، وكنت بشوف ده، عندي صحابي بيتطلقوا قريب وقولتلهم متطلقوش عشان الأطفال هتدفع تمن ده محدش هيدفع التمن غيرهم، وهو مش حاسس أنه بيخسر ولاده وهيفتقد يشوفهم وهما بيكبروا، أي حد بيخسر ولاده في الوقت ده عمره ما هيعرف يرجعهم تاني.
وأضافت منة فضالي: شُفت والدي لأول مرة وأنا عندي 21، وجالي عريس وقعد معاه وكان العريس عايش في أوروبا، وقالُّهم: خدوها ومش عايز منكم أي حاجة واحنا بنشتري راجل، وقال لأمي: هما بيحبوا بعض وخلينا نخلص، ولما العريس حكالي قولتله: مستحيل بابا يعمل كدا، قالي: لأ قالي كدا، مستحيل أب يعمل كدا.
وقالت منة فضالي: لما بتفرج على فيلم أو مسلسل وبشوف مشاهد عن الأب بعيط، وأنا شخصية حساسة وكل حاجة بتأثر فيا، ومبحسش إني عايزة أكلمه، هو ميعرفش عني حاجة دا بابا ناسي عيد ميلادي، عمري ما حسيت أنه عنده مشاعر تجاهي.