عمرو أديب يستنكر الهجوم على منى زكي: مستغرب جدا إننا واصلين لمرحلة الحواجب

استنكر الإعلامي عمرو أديب، الهجوم على الفنانة منى زكي، بعد صدور البوستر الدعائي لمسلسل «الوصاية»، لافتًا إلى أن «زكي» تعرضت لهجوم غير طبيعي، دون معرفة الجمهور للقصة أو الدور الذي تلعبه الفنانة.
وقال خلال تقديمه لبرنامج «الحكاية»، المذاع عبر فضائية «MBC مصر»، مساء الاثنين، إن البعض انتقد كثافة حواجب شخصية الفنانة بالمسلسل، معقبًا: «لو اتعملت الحواجب، هيقولوا إيه ده إيه الفتنة دي هو في ست محجبة شكلها وشفايفها كده».
وأضاف: «الغريب في الأمر يا سادة إن غالبية اللي بيهاجموا منى ستات، هي في القصة سيدة مقهورة عندها مشاكل، أومال لو طلعت محجبة وفي خصلة نازلة، كنتوا هتعملوا فيها إيه!».
وأكمل: «منى زكي ست محترمة ومتجوزة راجل محترم، عمرنا ما سمعنا عنهم حاجة وحشة، مفيش شيء سيئ يخلي التربص بمنى زكي كده، طبعا الحجاب فرض وأنا مقتنع بكده، وأحترم أي فتاة وسيدة محجبة، لكن هو مفيش واحدة محجبة شريرة؟».
وأشار إلى أن الحجاب ببعض المناطق المصرية زي أخلاقي واجتماعي، مشددًا على أهمية تقديم الدراما التي تعكس الحياة الواقعية.
واستطرد: «زي كل شغلانة في حد كويس وحد وحش، حاسس إني مضطر أشرح إن في ناس بتعمل سيئات وناس تعمل حسنات، الست لسة لا عملت سيئات أو حسنات، يعني قضايا العيش والفراخ والأسعار والوظائف والبلد والدنيا كل ده حلتوه، ومفيش غير مسلسل منى زكي!».
واختتم: «في ناس مستكترة على منى زكي تطلع تعمل دور بالحجاب، مستغرب جدا إننا واصلين لمرحلة الحواجب، إيه شغل كيد النسا اللي إحنا فيه ده، خفوا شوية على الست واستنوا لما تشوفوا المسلسل».