مرتضى لجماهير الزمالك: «بحاول أتجنب فيريرا عشان متعيطوش»

علق مرتضى منصور رئيس مجلس إدارة نادي الزمالك، على تعثر الفريق الأبيض بالتعادل أمام نظيره المصري البورسعيدي مساء الخميس، في مسابقة الدوري الممتاز.
وحسم التعادل الإيجابي بهدفين لمثلهما نتيجة مباراة الزمالك والمصري البورسعيدي، والتي أقيمت على ملعب برج العرب مساء الخميس، ضمن منافسات مسابقة الدوري الممتاز.
وقال منصور في تصريحات لقناة ناديه: «حزين زي كل الجمهور على النقاط اللى بنخسرها بس أتدخل ولا لا، أقفل الباب ولا أفتحه، والعيال تجعر ويقولوا بيزهق الرجل (مدرب الفريق)».
وأضاف رئيس الزمالك: «لما بدخل في صلاحيات المدير الفني بتعيطوا، أنا معكم في الحزن والزعل، بس أنا مقدرش أقوله تعالى شوف الناس بتقول أيه، لأن دي مش سلطتي ولا وظيفتي لما أقوله كده هكون بدخل في شغله».
وتابع: «أنا شايف كل اللي الناس شايفاه، بس مينفعش أقول لأني لو اتكلمت هتقولوا أنت جاي تطفشه، رغم أني اللي جايب فيريرا، ياجماعه هطق وزعلان لأن أنا واحد منكم مش رئيس النادي».
وأتم: «أنا جبت له 11 لاعب غير اللي كانوا موجودين وفازوا بالدوري، المفروض الفريق ميخسرش ولا نقطه، ياجمهور الزمالك اقفوا ورا الفريق و ورا فيريرا وربنا يهديه ويهدينا».