من تحت الترابيزة.. نص التحقيقات مع طالب هولندي لتصويره سيدة في مول مصر

تحقق نيابة الطفل بالجيزة مع طالب هولندي الجنسية متهم بالتحرش بسيدة تعمل أخصائي بشركة سياحة، حيث سجل فيديوهات لها بدون علمها بمقاطع تخدش حياءها بوضع هاتفه المحمول أسفل ترابيزة يجلس عليها وتصويرها من الأسفل داخل مطعم شهير بمول مصر.
وحصلت "الشروق"، على نص التحقيقات في القضية التي حملت رقم 723 لسنة 2022 جنح الطفل، وتضمنت اعترافات المتهم وأقوال المجني عليها.
*اعترافات المتهم: ويدعى "ع" 14 عامًا، طالب هولندي الجنسية.
وجهت النيابة للمتهم تهمة التحرش بالمجنى عليها "ف" بتسجيل فيديو لها بدون علمها بمقاطع تخدش حياءها وتصف مفاتنها على النحو المبين بالتحقيقات.
وقال المتهم: "اللي حصل إني كنت بتفسح وكنت لوحدي ودخلت قعدت في مطعم شهير بمول مصر الساعة 8.15 مساءً بمنطقة المطاعم".
واستطرد: "وأنا هناك كان قاعد معايا على الترابيزة ست وبتنها، وأنا كنت بصور المحلات عشان أنا سائح أجنبي وخفت تفتكرني بصورها فكنت بصور من تحت الترابيزة فالست افتكرتني بصورها هي وبنتها فزعقت جامد وجابت الأمن والأمن طلب الشرطة وخدوني على القسم والنهاردة جيت النيابة وده كل اللي حصل".
وتابع: "مليش علاقة بالمجني عليها أول مرة أشوفها ومعرفهاش قبل كده، وكنا قاعدين على الترابيزة بالصدفة مع بعض".
وأردف: "أنا مكنتش أقصد أصور رجلها"، واعترف: "صورت كل الفيديوهات اللي ظهرت فيها المجني عليها، بس أنا كنت قاصد أصور المكان وأنا لم أقصد تصويرها من رجلها".
* أقوال المجني عليها: وتدعى "ف" 31 عاماً تعمل أخصائي بشركة سياحة
قالت المجني عليها: "اللي حصل إنى أنا كنت قاعدة في مول مصر في منطقة المطاعم أنا وبنتي وبأكل بنتي جه ولد صغير حوالي 14 سنة قعد قدامنا وبعد شوية أنا حسيت منه بتصرفات غريبة كل شوية ينزل تحت الترابيزة، ويتعدل تاني ويتحرك تحركات مريبة، فأنا رجعت بالكرسي بتاعي للخلف علشان أشوف هو بيعمل إيه".
واستطردت: "لقيته حاطط تليفونه بين رجليه وبيصورني من تحت الترابيزة فأنا سالته انت بتعمل ايه ارتبك جدا، وقالي مش بعمل حاجة وخد التليفون من بين رجليله وعايز يمشي روحت أنا ندهت على أمن المول وجم وطلبوا منه إنه يفتح الموبايل رفض فبلغوا الشرطة، والشرطة جت وفتحلهم الموبايل لقوه مصورني حوالي أربع فيديوهات من تحت الترابيزة، مصور الجزء السفلي من جسمي وبعد كده الشرطة خدته ورحنا على القسم وعملنا محضر والنهاردة جينا على هنا".
وتلقى قسم شرطة أول أكتوبر، بلاغًا من سيدة تبلغ من العمر 31 عامًا، تتهم فيه طالب بالتحرش بها وتسجيل فيديوهات لها بدون علمها بمقاطع تخدش حياءها بوضع هاتفه المحمول أسفل ترابيزة يجلس عليها وتصويرها من الأسفل داخل مطعم شهير بمول مصر.
وتمكنت الأجهزة الأمنية بمديرة أمن الجيزة من القبض على المتهم وتبين أنه طالب هولندي الجنسية، وحرر محضر بالواقعة، وتباشر النيابة التحقيق.