غطي وجهك..!

منَّ الله علىّ بالذهاب فى رحلة للعمرة فى شهر رمضان قبل الأخير.. أيام كاملة تفرغت فيها للعبادة والصلاة فى جو روحانى لم يعكره إلا تلك الحادثة أمام بيت الله الحرام.. ففى أثناء وقوفى أمام الكعبة داعية الله طالبة رحمته إذ بصوت يخترق دعواتى: «غطى وجهك».. التفت حولى لأرى صاحب الصوت الذى استمر فى المشى مبتعدا ثم التفت إلى مرة أخرى ليعيد جملته الحاسمة، التى قالها فى نبرة غاضبة: «غطى وجهك»..
أولا خلونى أشرحلكم الوضع.. إحنا فى الحرم.. فى رمضان.. يادوب فيه مكان يقف فيه الجميع.. أنا واقفة على السلم المواجه للكعبة أمام مصلى النساء.. يحيط بى نحو 20/30 واحدة على أقل تقدير.. وبالطبع لأننا فى عمرة فالكل كاشف وجهه.. طب إشمعنى أنا بأااه؟..
لو كنت بأحكيلكم إن اللى حصل ده حصل وأنا واقفة على محطة أتوبيس مثلا كل اللى كان هيتبادر لذهنكم إنى يا إما لابسة لبس مستفز يا إما حاطة ماكياج صارخ يا إما واقفة مش على بعضى أو فى مكان يثير الشبهات، وهو ما أثار الشخص الكريم كتر خيره وخلاه يرمينى بالكلمتين دول.. لكن إحنا فى الحرم وأنا فى ملابس العمرة البيضاء.. فى وسط رمضان.. قبل المغرب بساعة وأنا صايمة وخلصانة.. بادعى ربنا أمام الكعبة.. وفى الأول والآخر أنا مش كاثرين زيتا جونز.. جميلة الحمد لله لكن مش لدرجة تلفت نظر واحد فى مكان للعبادة والصلاة.. يبقى حضرتك اللى مركز معايا وصعب عليك تغض بصرك حتى فى أطهر مكان على وجه الأرض..
والحل إيه؟.. أنا اللى المفروض «أغطى وجهى».. ذنبك وانت اللى ارتكبته وعايز تشيلهولى.. كلام منطقى ومعقول؟.. لكن برضه أنا متأكدة إن فيه ناس هتقرا وهتقول.. أكيد برضه عملتى حاجة ما هو مش معقول الراجل هييجى يكلمك منه لنفسه كده..
وهكذا اعتدنا.. تختلق مجتمعاتنا دائما الأعذار للإخوة الرجال المحترمين وتحمل المرأة المذنبة دائما حتى وإن كانت ضحية كل المسئولية.. فى أزمة النقاب الأخيرة تابعت العديد من المناقشات، التى تتحدث عن حق المرأة فى ارتداء ما تراه مناسبا وعن حق المجتمع فى رفض زى لا يمثله، وهل النقاب فرض أم سنة، عادة أم عبادة؟.. لكن السؤال الأهم.. هى اللى بترتدى النقاب بتختار ترتديه ليه؟..
اللى سمعته من منتقبات كتير هو سبب من اتنين.. أولا سبب يتعلق بالتشدد.. ببساطة هى بتعمل حاجة زيادة عن بقية الناس آملة فى ثواب أكبر من الله.. الست بتعذب نفسها بصراحة.. تغطية الوجه والكفين مع بقية الجسم بقماش أسود فى عز الحر والرطوبة شىء مش سهل بالتأكيد.. لكن حديثى معهن أكد لى إن مش هو ده السبب اللى معظمهن بيلبسوا النقاب عشانه.. «بحافظ على نفسى.. ودرءا للفتن» هم الكلمتين اللى بيجروا على لسان الأكثرية منهن..
بالتأكيد إحنا مش عايشين فى مجتمع خالى من المرضى، حوادث التحرش والاغتصاب مالية صفحات الجرائد.. لكن هل الحل فى تربية المجتمع أم فى حجب نصفه.. وهل لا نستطيع درء الفتن إلا بلبس طاقية الإخفاء؟..
فى فترة سابقة كانت تأتينى كل يوم على صفحتى على الفيس بوك من 5 ل6 دعوات لمجموعات تتحدث عن الحجاب وفرضيته والآن الموضة هى المجموعات التى تتحدث عن النقاب وأهميته.. لكن ما افتكرش جاتلى دعوة لأكثر من مجموعة أو اتنين تدعو الرجال إنهم يحترموا نفسهم أو الناس إنها تربى أولادها..
دائما وأبدا هى غلطة الأنثى وحدها.. والراجل آمن ضد أى اعتراضات خلف جمل مثل «أصله شقى شويه».. «طيش شباب».. «بكره يعقل».. «الراجل ما يعيبوش حاجة».. تقع المرأة المصرية الآن تحت تأثير خطاب دينى متشدد يحثها باستمرار على المزيد من الاحتشام، الذى يصل لدرجة الاختفاء تماما عن الأعين حتى لا تثير الرجل الغلبان قليل الحيلة، الذى لا يستطيع أن يتحكم فى غرائزه ولا يمكنه أن يحترم نفسه أمام أى امرأة.. الرجل بلا عقل.. طفل كبير.. يجب علىّ أنا أن أدفن نفسى فى حفرة فى الأرض حتى «أحميه» من نفسه ونفسى..
بيقولوا الزن على الودان أمر من السحر.. والحديث المستمر عن المرأة الملعونة.. السبب فى كل المصايب.. المثيرة للغرائز والشهوات فى أى زى وأى مكان كفيل بإشعار آلاف النساء بالذنب للدرجة، التى تجعلهن يخترن العزلة الاختيارية فى خيم متنقلة حتى ينقذن المجتمع من الشرور الكامنة فى وجوههن.. الحجاب فرض.. والاحتشام شىء جميل.. لكن آسفة، مش مسئوليتى لوحدى.. مش هاختفى نهائيا من الحياة عشان إنت مش قادر تحترم نفسك أو تربى أولادك.. ويا ريت تفتكر تغض بصرك قبل ما تيجى تشخط فيا بعلو صوتك وتقول لى «غطى وجهك».