«ثورة» بين أولياء الأمور لتأخر استلام الكتب بالمدارس وعجز «أعداد المعلمين»

قالت عبير أحمد مؤسس اتحاد أمهات مصر للنهوض بالتعليم، إن هناك عددا كبيرا من أولياء الأمور واجهت أبنائهم بعض المعوقات في المدارس منذ بداية العام الدراسي وحتى الآن، مطالبين الوزارة بإيجاد حلول لهذه المعوقات والشكاوى من أجل استقرار أبنائهم في دراستهم.
ووجهت «أحمد»، في تصريحات لها اليوم الأحد، مجموعة من التساؤلات للدكتور طارق شوقي وزير التربية والتعليم، تضمنت: «ما هي أسباب تأخر استلام الكتب المدرسية في عدد كبير من المدارس حتى الآن ونحن في الأسبوع الثالث من العام الدراسي الجديد؟ ولماذا يوجد عجز في المعلمين ببعض المدارس؟»، مطالبة الوزير بالرد على هذه التساؤلات لطمأنة أولياء الأمور وحل المشكلات التي تواجهم، وكذلك سرعة طباعة وتوزيع «دليل ولي الأمر»؛ حتى يستطيع أولياء الأمور متابعة أبنائهم في النظام الجديد لرياض الأطفال والصف الأول الابتدائي.
وتفاعل عدد كبير من أولياء الأمور على صفحة «اتحاد أمهات مصر للنهوض بالتعليم» على «فيسبوك»، حيث قالت إحدى أولياء الأمور: «مدرسة محمد كريم القومية التابعة لإدارة شرق التعليمية بالإسكندرية.. أولى ثانوي مفيش كتب لسه»، وأضافت أخرى: «مدرسة الخصوص الرسمية التابعة لإدارة الخصوص التعليمية بمحافظة القليوبية.. المشكلة إن احنا لحد دلوقتي مأخدناش حاجة، يعني مفيش تعليم أصلا لأولى ابتدائي تجريبي، وضايعين مع الولاد، واستلمنا كتب عربي وباقة بالعربي وكونكت، لكن مفيش شرح وكل مدرس يدخل يكتب على السبورة ويقول للولاد (انقلوا) وخلاص على كده، وحتى الولاد مش بينزلوا بريك وبيفضلوا في الفصول طول اليوم».
وتابعت ولي أمر: «إدارة السلام التعليمية كلها مفيش كتب (كي جي)، وأولى ابتدائي مأخدوش غير كونكت وعربي بمدارس الحرية ومحمد أنور السادات العادي والفيوتشر»، واستكملت أخرى: «الكتب الخارجية بقت ترمين، يعني سعرها زاد عن الأول، كانت كتاب واحد وسعره أقل وحاليا كتابين للترم الأول والتاني والسعر زاد طبعا، ده غير أسعار الملازم وكل ملزمة بسعر 100 و150 جنيها، غير الدروس 100 و150، وفي 8 مواد، ومفيش وقت للمذاكرة خالص.. كل ده في سنة أولى ثانوي»، معلقة: «هنعمل إيه في تانية وثالثة ثانوي؟!».
وأضافت ولي أمر أخرى: «مدرسة سعد زغلول التجريبية لغات التابعة لإدارة المعصرة التعليمية، مفيش مدرسين ماث وساينس وإنجليزي ل3 إعدادي، رغم أن المدرسة كانت نموذج يحتذى به»، وتابعت أخرى: «مدرسة نجيب محفوظ الابتدائية المشتركة التابعة لإدارة حلوان التعليمية.. خامسة ابتدائي استلموا الكتب يوم الخميس الماضي، ولكن ثانية ابتدائي لسه مستلموش»، وقالت أخرى: «كلية السلام الرسمية لغات التابعة لإدارة الزيتون التعليمية.. أغلب المدرسين مابيشرحوش، ليه مايبقاش في شرح والتزام بالمدرسة حتى لو مفيش أعمال سنة؟ ليه نربط الحضور والالتزام من المدرسين بأعمال السنة؟».
وقالت ولي أمر: «مدرسة المنيا الرسمية لغات بها نقص في مدرسين الماث، ابني حتى الآن مدخلهوش مدرس ماث خالص، ولما روحنا للمديرة قالت اشتكوا في المديرية.. حقيقي حاجة تقرف»، واستطردت أخرى: «ابني في أولى ابتدائي.. مش قادرة استوعب بياخد إيه، وإيه المطلوب مني في البيت للمتابعة، وبعض المدرسين بيرفضوا التواصل على النت».