دعا الدكتور جابر نصار، رئيس جامعة القاهرة، طلاب وطالبات وأساتذة الجامعة إلى سحور في 17 رمضان أمام القبة ابتداءً من 11 مساءً، وذلك في إطار تشجيع مبادرات النشاط الطلابي بجامعة القاهرة «اقترح نشاطك واحنا ننظمه معاك». وأضاف نصار، على صفحته الشخصية بموقع التواصل الاجتماعي «فيسبوك»، اليوم الخميس: "حاجة كده تفرح بجد، عربيات فول وطعمية ومفاجأت كتيرة، وعربيات كبده وسجق وحواوشي وكله مضمون وفطير مشلتت وجبنة قديمة - مش يعني - وعسل أبيض وقشطة وفواكه ومكسرات، عربيات ترمس وكل اللى تتخيله". وتابع: "مش بس كده دي هتبقي ليلة من ألف ليلة، تنورة ومديح وفلكلور شعبي وكمان الطفل الجميل أحمد السيسي، مفاجأت عديدة ومتعددة بجد، هتنبسط يعني هتنبسط". واستطرد نصار: "البنات ممكن تيجى مع حد من عيلتها أبوها، أخوها، والدتها، أهلا بهم، ويوجد باص لطالبات المدينة يأخذهم للجامعة ويعود بهم بعد السحور، ستكون ليلة جميلة وأحىي ليلة"، مقدما التحية لطلاب «HOW TO BE» أصحاب الفكرة والمنظمين الأساسيين. وقال رئيس جامعة القاهرة: "يلا تعالى اتسحر مع لمة جميلة أمام قبة الجامعة وخد لقطة تاريخية مش هتنساها، وعلى فكرة الحفل له رعاة يعني تأكل وتشرب وتفرفش مجانا والجامعة لن تتكلف شئ، مش بقولك جامعتك جامعة مختلفة وبتفكر فيك، وسيبك من موضوع الخيمة بقى وحقك على وهتروق وتحلى وهتبقى أحلى سنة على الحقوق والجميع في كل الكليات".
