عباس: "اشمعنى لاعيبة الزمالك هي اللي مش ملتزمة وعماله تتنطط في الفضائيات"!!

أبدى ممدوح عباس رئيس نادي الزمالك استياءه الشديد من تصرفات بعض لاعبي الفريق الأبيض بسبب عدم التزامهم مع ناديهم.
وقال عباس في تصريحات ل"لنهار رياضة": "هو فيه إيه.. لاعيبة الزمالك مش ملتزمه ليه.. كل واحد يسيب التمرين ويمشي على مزاجه.. وعمرو زكي عمال يلف على الفضائيات وعامل حدوته وهيصه.. ولا حسين حمدي اللي ساب التدريبات وبيصرح في الإعلام".
وتابع عباس غاضبا: "ماينفعش دا يحصل من اللاعيبة.. دا حسن شحاتة لما كان بيدرب منتخب مصر كان مقعد شيكابالا على الدكة".
ووجه رئيس القلعة البيضاء رسالة خاصة إلى لاعبيه قائلا: "لو عايزين تاخدوا الدوري سيبكم من اللي بيتكتب في الإعلام".
ومن ناحية آخرى صب عباس غضبه الشديد على بعض وسائل الإعلام بسبب الشائعات التي تطلقها على نادي الزمالك.
وقال رئيس النادي: "هو مافيش غير الزمالك اللي الإعلام مركز عليه ما فيه 18 نادي تاني.. هو كل ما الفريق يفوق الإعلام يرجع يهدمه.. نقفل ولا نشمع النادي عشان تستريحوا".
وأضاف عباس أن حسن شحاتة لم يطلب زيادة مالية في عقده مثلما تردد في بعض وسائل الإعلام، مؤكدا أن المعلم طلب تعديل بندا ليس له أي علاقة بالأمور المادية.
وواصل غاضبا: "مش عارف ليه الناس بتقول إن الزمالك كان وحش قدام دجلة أمبارح.. أنا شايف أن الفريق كان حلو وكنا بنلاعب فريق محترم".
*