قصيدة لخبطة من ديوان مشاوير

عمرك قريت اسمك مكتوب
علي سطر مايل بالمقلوب
عمرك لقيت نفسك بتعوم
في البحر وانت ماتعرف عموم
أنا اللي كنت معبي هموم
تكفي ألف مابعرف ليه
يمكن عشان كان نفسي الناس
تنده عليً تقولي يابيه
ولقتني ولا بيه ولا حاجة
في دنيا خاينة وكدابة
حطيت علي الصورة فلوسي
الرفة طلعت لي كتابة
روحت م القهوة وعديت
تلات نواصي لحد البيت
لقيت عيال عاملين زيطه
فتحت بابنا لقيت حيطة
فدخلت م الصور المكسور
فجأة انقطع في الضلمة النور
نطيت من الشباك جوه
وقعت واقف في الهوه
طلعت غلي سلم مكسور
حدفني فوق فوق سطح المترو
مااعرفش ليه ناس شديني
ركبت تاكسي ماهوش اجرة
لقتني تحت نفق شبرا
المطرة نزلت علي صدري
البت واقفة قالت لي اجري
خبتني فوق تمثال رمسيس
كان لسه باقي معايا فلوس
ركبت قطر راجع أشمون
لقتني واقف في الاتوبيس
نزلت في ميدان الاوبرا
قدمت ديوانين للمسرح
قالولي كسبت (با با ابح)
انبح صوتي وزاد قهري
طقت في راسي أمشي بضهري
ضربني واحد علي وشي
جريت ورايا ماحصلتوش
مالوش نصيب اللي أذاني
جاني جواب علي عنواني
مبعوت لي بوظيفة عشاني
خلاني أجري علي البوستة
مالقتش ولا طابع واسطة
سالت دموعي علي خدودي
عديتها وصلبت في عودي
خطبت بت اسمها دودي
شهرين تلاته بقت محمود
رفعت جنحة نصب وغش
في الدش وطني مابينه حدود
أخويا هايص وانا لايص
والمش في البلاص موجود
شربت منه أنسي ألامي
مالقتش فيه ولا سوس ولادود
ولاحاجة بتشرخ زوري
تهتهت واتلعثم قولي
ولا عادش عزمي ياخلق شديد
أنا كنت واقف مرة بعيد
بصيت بعيني لمحت العيد
شايل حاجاته وماشي وحيد
سألته وحدك ليه وحزين
قال لي الحبايب في فلسطين
مستنيين رجالة شداد
قلت اما اسافر علي بغداد
يمكن ألاقي هناك أولاد
يكونوا للأحزان ناسيين
مليون سلام من قلبي ياعيد
كان نفسي اكون وياك وأكيد
فاهم ظروفي واديك شايف
سهران لوحدي ومش خايف
لامارينز ولا جنس تحالف
ولا اي عربيد بيخالف
أمر الأشاوس والصناديد
ادعيلنا بس بعمر مديد
نسمع سوا فيه الزغاريد
لما يشقشق فجر جديد