مصرية

مصريه
ف وسط الضلمه تتلألأ
لا تتلخبط لا تتلألأ
و لا تشتت ف أحلامك
دا كل الدنيا قدامك..
تدوس الخونه أقدامك
و تمشي طريقك الواضح..
برغم الضلمه له ملامح
كما البنور…
بتعكس كل ذراته شعاع من نور
بيتلألأ..
ولو هتبص و تدقق..
تلاقي كتير تابع خطاويك
و بيردد جميع غناويك
نسيم البحر هايم بيك..
و متغرّق..
بعطر من النجوم و البحر
رذاذه يدوب كأنه السحر
بخور هايم ..
ف تعويذه
بإن الحر ما يخافشي
كلامه لابد راح يمشي
وانا الحريه في دمي
انا الحريه دي همي
انا المصريه ما عمي
سوى الصالح
ما اقول للندل يا عمي ..
و ما اتصالح…
ف يوم ويّاه..
و مهما الآه ..
هتوجع في حنايا الروح
باداوي بإيدي مِن مجروح
و انا واقفه..
جبيني لفوق..
و راسي تمللي مرفوعه
وكلمة حِسي مسموعه
ف وسط الكون..
يكون مجنون
من حاول يقف لي سد
أهد السد ما اتهد
أهدك يا عويل و بجد
بلاش طيفك يقرّب لي