شيخ العرب

السحاب
اللي نايم كله في
شقوق السما
رافض يمطر صبر
في قلوب
البشر
نفسه ينشق الحجر
كل القواعد تنكسر
بيحلم يعيش
فاتح كتاب الأمنيات
يقرأ في سطور السما
رافض انقلاب الجو
بين صيف او شتا
والليل أماني مشتته مالية
القلوب
مين اللي قال
الشمس طلعت في السما
تغفر ذنوب
عالم بيعشق العما
الملحمة لساها فاضلة منتهتش
اسف يا شيخ الزجالين
يا شيخ مشايخ العرب
يا أخر الفرسان في زمن الصعلكة
ما قدرتش احضر دفنتك
مين فينا يحضر دفن مين
مش انت وحدك اللي عايش ف الكفن
كل شئ حواليه مات واندفن
كل شئ صابه العفن
ضاع خلاص في المعمة
ما عادش فاضل في السما
لو نجمة واحدة ملمعة
كل العيون
........
مفنجلة ومدمعة
مين فينا يحضر دفن مين!
اسف يا عم ادريس قوي
الأمر ما زال محتدم
مستعصي حل المسألة
والقضية المسرحية
مستمرة لم تتختم
تعرف يا خال
دبت رجيلك في السما
وصلت لي رعد
رجت جبال الصمت بصرخة نبي
مش كان بيننا وعد
بلاش تغيير لي معالم كوكبي
خلتني اخاف من كل اصوات السما
فدفنت نفسي في الحصير
قولي يا خال
عملت أية في الحور يا خال
شربت و ياهم عصير
و قاعد بتحكي لهم حكاوي عننا
ما أنت عايش طول حياتي غاوي الأمان
ولم تحتمل .... شيطان يمسك صولجان
و يتوه في ملامح ملاك
يا أخر الرجال الطيبين
معادش فاضل عندنا للطيبه مكان
مبروك عليك جنتك
بذمتك
مش احلي من عالم عجيب
بالف لون من كل الوان الجنون
فيه العيال في المدرسة
خايفين ليمسكوا مسطرة
يتمدوا بيها جوه سكن الذكريات
والبنات قافلين بيبان المندرة
رداين شبابيكهم بخوف
للحلم تاني ينسرق
تعرف يا خال
مش كنت طيب و بصحيح
فاكر معاك كان حل كل المسألة
وتقول لي قال: الحل في الأشعار
واحضان الزجل
و انزل براسي اقول أجل
طيب يا خال
هيفيد بأية بس الزجل
الحل مش جوه الزجل
او في ارتجال الحلم من بعد الموات
الميتين للميتات
والوقت فات
والحكاية ملعبكة