خواطر ثورية

الثورة ثورة يناير
قامت على الظلم اللي داير ... اللي مش عايز يقاوم
ما .. يسكتش اللي ثاير ... ويسيبه من المناقشة
ويريح دماغه ... وبروح يشوف له كوره
او يروح يشرب سجاير ... يروح يسهر مع الف ليلة
ويصبح يساير ... هو ده النوع اللي فاكر
انه بسكوته راح ياكل فطاير ... او يقلع الخيش القديم
ويلبس مكانه الحراير ... كل مرة نقول لحازم كفاية
نلاقي الف حازم له حكاية ... يبقى مش حازم هو الحكاية
دي العصابة مانتهتش من الرواية ... يعني ثورتنا ... ما وصلتنا للنهاية
دي البداية اللي إحنا فيها... الا اذا نجحوا ... وخوفونا من النهاية
بيخوفونا من الفتن والبلطجية ... وامننا ضايع .. والسم ناقع
ويقولوا ان إحنا اسباب القضية ... ماتعودوش عالصرخة عالية
والشكاوى الحقانية ... عودونا عالعصاية .. والوصاية
واحنا سلمنا الولاية ... للعصابة المفترية
بس بعد الثورة والتحرير ... والميدان والعباسية
شعبنا عرف الحقيقة ... والطريقة الربانية
إحنا مش حانخاف .. خلاص ... اللي مكتوب له الحياة
راح يعيش رغم الرصاص .. واللي انتهى منه الأجل ..
ما له منه مناص ... كلنا خالد سعيد ... رغم الرصاص
كلنا حازم صلاح ... والمحكمة قالت لنا
ان أوراقه صحاح ... ماتسلميش يامصرنا
والشمس باتت عندنا ... انت الشروق يامصرنا
انت الصباح ... وماتخافيش واماتسكتيش ... الفجر لاح ... وا ماتندميش
كل اللي راح ... راح ييجي يوم يرجع لنا ... يامصرنا ... يا ساقية الحب
ويا راوية الحق ... قولي الحق للكادح العامل ... والفلاح
قولي له ان للحق في بلدي ... صروح عالية ... وان إحنا مش هنا عشان نرتاح
مش قبل ما ولادنا يرفعوا راسهم ... ويشوفوا ان الذل راح
ويطلعوا ... فوق المآذن والأهرام .. وينادوا ... حي معايا على الفلاح
ويرفعوا راياتك الحلوة يامصر ... ويعلنوا ... الفجر لاح
راحت ليالي الظلم والقهر ... بدأ الكفاح
انت يامصر اللي حنيتي ... على كل الغلابة
انت اللي منك يشربوا ... علم وكتابة ... انتي اللي ضميتي المسيح
وعليتي اسماء الصحابة ... انتي اللي نيلك منهله ... علم البكم الخطابه
يا زمزم الساقي لعزي ومنهلي ... لا تسقني ذل الإجابة
والغلابة الطيبين ... يقولوا الصبر فين ... ما تخلوا بالكم من ولادكم
انتوا حاتودونا فين ... إحنا بقينا شحاتين ... عند الزبالة والمقابر
والمحاجر والمدابح مسلوخين ... هوه ده كان عمره يمكن
لو ما كنا إحنا ساكتين ... من سنين ... طال الأنين راح الطنين
وبقينا نسمع بعضنا ونقول كلنا ... بصوت واحد ... إياك نعبد وإياك نستعين
ده الصوت اللي بيخوف ... ويطرد من حياتنا الخوف ... من غير رب العالمين
علشانك انت ... يامصر الحنين ... راح نطرد الخوف من كل قلب
راح نزرع مكانه كل حب ... راح نطرد الذل اللعين ... ولكل مصري راح نقول له
قولة الحق المبين ... انت حر .. انت مصري ... انت أقسمت اليمين
لا تعش بالذل يوماً ... خشية العز المكين!!!