غمض عينيك

مدبوح يا دم المحرومين
تعبان قوي
من كتر جريك في العروق
ولا يوم تدوق
طعم الهنا اصلك هنا
من يومها تحلم بالامان
والشمس تطلع في الغيطان
تمسح عينيك المبلولين
تكتب شهاده للميلاد
من غير وجع ولا الم
ولا نقطة حمرا في العلم
تنسى بقا قرف السنين
ترمي همومك في المحيط
مش كل حيط راح تسمعك
ولا كل سناره وخيط
تنزل تجيب حتة سمك
حلمك تعب م الانتظار
ساعة النهار بتشوف ضباب
والرؤية محجوبة هناك
بينك وبين النور يادوب مترين سراب
مال الهوا حادف شمال
مش مركبك راح تعجبك لو فيها فتحه للخيال
اصل الدماغ شايفه الشراع
زي البتاع اللي طلب
يرجع يعيش ف الاحتلال
طاب تصحى ليه من غير معاد
فاضيه البلد مفهاش ولاد
غمض عينيك شد الغطا
اصل الحكايه ملخبطه
والصورة لو متشخبطه
تعجب عنين النعسانين