محاولة انتحار

محاولة انتحار
لما شعاع الشمس يبدأ في انكسار
لما الغروب يحل واحنا بالنهار
لما في عز شوقنا للأمطار
تمطر سمانا علينا وابل من حجار
ان كان كبارنا بالذنوب يتعاقبوا
بذنب مين يتعاقب الصغار
مين باع الاقصى ودم شهدائه
ومين اللي بنى الجدار
مين كانت روحه تمن للعزه
ومين اللي جاب العار
مين باع بكرا قبل النهارده
ومين أهدانا الانتصار
مليون سؤال على وشوشنا
وفي قلوبنا مليون سؤال
مين اللي مسؤل عننا
ومين في ايده أمرنا
مين اللي ضيع عمرنا
وسط الحصار
مين اللي كمم الافواه
مين تتطاطيله الجباه
سلم شرفنا للعتاه
مين مسؤل عن هتك العرض
وسوء الفكر والزحمة وغلا الاسعار
روحوا اسألوه لو تقدروا كان ليه
ضميرنا بيعناه مقابل الجنيه
العمر راح وضيعناه في ايه
ارواحنا بتتخنق قدام عينيه
قلوبنا وكلاها الهموم
أحلامنا بتتحرق بالنار
وفي وسط كل اللي احنا شايفينه
وجوه حاضر احنا عايشينه
مستنين لحظة ما يتشد الستار
يخرج صلاح الدين
شايل سيفه البتار
وما بين صراخنا ولهفة الانتظار
تلوح لعيونا من بعيد
محاولة انتحار